«Келешек мектептері» білім сапасын арттырып, апатты және үш ауысымды білім ұяларының проблемасын шешуге көмектеседі. Қазір еліміздің барлық өңірінен осындай мектептердің құрылысы қарқынды жүргізілуде. Мәселен, Түркістан облысында аталған бағдарлама бойынша 29 нысан ашу жоспарланса, соның 13-і пайдалануға берілді.

Төлеби ауданының Достық ауылында қазір «Келешек мектептері» бағдарламасы бойынша 900 орындық ғимарат салынуда. Жаңа білім ошағының артықшылығы сол — бастауыш пен жоғары сынып оқушылары бөлек блоктарда оқиды. Онда оқу кабинеттері, спорт залдары, түрлі үйірмеге арналған бөлмелер болады. Бастысы бұл мектеп ауылдағы үш аусым проблемасын шешеді.

Пернебек Асанов, Төлеби аудандық Білім бөлімінің әдіскері:

Леңгір қаласындағы сонымен қатар №1, №3 мектеп, оқушыларға орын тапшылығы бар мектептерден қосымша оқушылар келеді. Олармен мұғалімдер де қосылып бірге ауысып келеді. Сонымен қатар қосымша алынатын оқушыларға дәріс беру үшін мұғалімдер конкурспен қабылданады.

Ауылда да, қалада да жаңа бірыңғай стандарт бойынша салынып жатқан ғимараттарда оқушыларға барлық жағдай жасалған. Балалардың шығармашылық дамуы мен демалуына да көңіл бөлінген. Физика, химия, биология және робототехника пәндері бойынша заманауи кабинеттермен жабдықталады. Қазір Төлеби ауданында осындай 3 мектептің құрылысы жүргізілуде.

Мадияр Тоқтағұлов, учаске бастығы:

Қазіргі таңда мектептің ішкі әрлеуі 95 пайызға бітіп тұр. Сыртты абаттандыру 40 пайызға жақындап қалды. 3 спортзал қаралған. Төменгі сыныптар, орта буын және жоғары сыныптағыларға. Биыл жаңа оқу жылында тапсырамыз.

Ал Арыс қаласында бой көтерген «Келешек мектебінің» құрылысы аяқталуға жақын. Тамыз айында тапсырылуы тиіс мектеп 600 оқушыға шақталған. Заман талабына сай салынған ғимаратқа мемлекеттен 4,5 млрд жұмсалып отыр. Бүгінде пәндік кабинеттерге жиһаздар орналастырылып, оқу құралдары жеткізілуде.

Есіркеп Жанықұлұлы, мердігер мекеме өкілі:

Сырттың құрылысында тек қана асфальт төсеу жұмыстары қалып отыр. Қазіргі таңда техникалық бөлігін қою жұмыстарын жүргізіп жатырмыз. Құрылыста 60 адам жұмыс істеп жатыр. 7 арнайы техникамыз бар. Осы айдың аяғына үлгеруге бар күшімізді салып жатырмыз.

Айта кетейік, елімізде саны жағынан ең көп «Келешек мектептері» Түркістан облысында салынып жатыр. 29 мектептің барлығы жыл соңына дейін тапсырылады деп күтілуде. Десе де өңірде мектеп жетіспеушілігі мәселесі әлі толықтай шешімін таппаған. Аймақтағы білім ошақтарының саны мыңнан асса да, балалар үш аусымды мектептерде білім алады.

Айнұр Әбілқасымқызы