Елордада жылдамдығы секундына 10 гигабитке дейін жететін интернет желісі іске қосылады.
«Орталық Азия – Қытай» форумында қол қойылған құжаттардың бірінде осындай мәміле бар. Пилоттық жоба Астана әкімдігі мен қытайлық компания арасында жасалған ынтымақтастық аясында жүзеге аспақ.
- Желі қолданушылары үшін бұл бастаманың тиімділігі неде? Қазір ел аумағында халықты сапалы интернетпен қамту деңгейі қандай?
Ресми деректерге сүйенсек, бүгінде халықтың 92 пайызға жуығы интернет желісімен қамтылған. Ел билігі 10G-ге өту цифлық инфрақұрылымның одан әрі дамуына ықпал етеді дейді. Бұл оныншы буындағы мобильді интернет емес, жоғары өткізу қабілетімен ерекшеленетін кабельді интернет. Яғни тек үйлер мен кеңселерге арналған. Бұл елорданың цифрлық дамуына жасалған маңызды қадам, дейді сарапшылар.
Данабек Қалиаждаров, ASTANA HUB бас директорының кеңесшісі:
- Бұл жерде америкалық та технология болуы керек, қытайлық та болуы керек. Ресей алдыға шығып жатса олардікін де алу керек. Бұл жерде саясат азырақ. Көбіне бұл жаһандандырылған саланың бірі. Қазір ел елмен ғана емес, қала қаламен конкуренцияға түсіп жатыр. Астана, Алматы, Шымкент, Түркістан, Ақтау, біздің үлкен қалаларымыздың бәрі Бішкек, Баку сияқты қалалармен конкуренцияға дайын болуы керек.
10G технологиясы әзірге әлемде тек бірнеше дамыған елде ғана пилоттық режимде іске қосылған. Атап айтқанда, Қытай, АҚШ, Жапония, Оңтүстік Корея, Франция, Германия және Ұлыбритания осы бағытта алдыңғы қатарда. Енді бұл тізімге Қазақстан да қосылмақ. Мәселен, аталмыш жоба қазір Бейжіңге жақын Сюнъань ауданында сынақтан өтіп жатыр. Мамандар байланыс жұмысы тұрақты дейді. Белгілі болғандай, байланыстағы кідіріс бар болғаны 3 миллисекундты құраған. Бұл қазіргі технологиялардың жылдамдығынан ондаған есе артық.
10G интернет пилоттық режимде енгізілген елдер:
Қытай
АҚШ
Жапония
Оңтүстік Корея
Франция
Германия
Ұлыбритания
Қазақстан
Жоғары жылдамдықты интернетке қатысты қала жұртшылығы да өз пікірлерін білдірді. Байланыстың жылдам әрі үзіліссіз болуы уақыт талабы, дейді елорда тұрғындары.
БЛИЦ:
Егерде 10G интернет қосылса жылдамдық артады, сапасы жоғарылайды, тұтынушылар қанағаттанады деп ойлаймын.
Интернет ұстаған жақсы ғой жылдам. Қазіргі өмірде интернет қой бәрі. Жұмысымыздың бәрі интернетпен, ақша жіберсек те интернетпен.
Керек қой, өйткені даму керек қой. Қазір интернетсіз түк істей алмаймыз. Қолданамыз ғой.
Жылдамдығы өте жақсы болады деп ойлаймын жұмыс жасайтын мамандар үшін, программистер үшін. Мен қолдаймын. Бізде жалпы скорость өте жақсы, басқа шетелдермен салыстырғанда.
Статистика бойынша Қазақстан интернет бағасы ең арзан елдердің қатарында. Жаңа буын технологиясын елге әкеп, оны енгізу үшін қыруар қаражат жұмсалады. Сондықтан бағаның нарыққа сәйкес өзгеруі қалыпты құбылыс, дейді мамандар.
Данабек Қалиаждаров, ASTANA HUB бас директорының кеңесшісі:
- Хуавей салып жатқан 10 гигабит интернет дейміз. Оның бәріне сен доллармен ақша төлеу керексің. Сен теңгемен оны сатып ала алмайсың. Оған 10 млрд теңге емес, 20 млн доллар беру керексің. Обычно оны қалтадан алып сала салмайды. Ол төленіп отыруы керек белгілі бір уақыт арасында. Сондықтан мен оны қымбат деп ойламаймын.
Цифрлық даму, инновациялар және аэроғарыш өнеркәсібі министрі Жаслан Мәдиев 2027 жылға дейін ауылдардың 99 пайызы жоғары жылдамдықты интернетпен қамтылатынын мәлімдеді. Осы мақсатта министрлік пен «Қазақтелеком» арасында инвестициялық келісім жасалды. Жобаға бюджеттен тыс 239 млрд теңгеден астам инвестиция тартылды. Соның аясында ел аумағында үш мыңнан астам ауыл интернетке қосылады. Ауылдық елді мекендерді талшықты-оптикалық және жерсеріктік арналар арқылы желіге қосады.
Инвестиция көлемі:
239 миллиард теңге
Интернетпен қамтылатын ауыл саны:
3000-нан астам
Интернетке қосылуы:
Талшықты-оптикалық желі – 88%
Жерсеріктік байланыс– 12%
Қазақстан мобильді интернет бойынша әлемдік рейтингте 49-орынға тұрақтаған. Алдыңғы қатарда Біріккен Араб әмірліктері, Катар және Кувейт тұр. Ал, кеңжолақты интернет жылдамдығынан Сингапур көш басында. Бұл сатыда еліміз 83-орынға жайғасқан.
Мобильді интернет жылдамдығы:
1 БАӘ– 453,87 Мбит/сек
2 Катар – 383,5 Мбит/сек
3 Кувейт – 257,3 Мбит/сек
49 Қазақстан — 81.6 Мбит/сек
Кең жолақты интернет жылдамдығы:
1.Сингапур – 345.3 Мбит/сек
2.БАӘ – 313.6 Мбит/сек
3.Гонконг — 305,71 Мбит/сек
83. Қазақстан — 77,93 Мбит/сек
Бұдан бөлек осы күзден бастап Starlink спутниктік интернеті Қазақстанда қолжетімді болады. Жоба шалғай аймақтарды жоғары сапалы интернетпен қамтуға мүмкіндік береді. Бұл елдегі телекоммуникация инфрақұрылымын дамытуға септігін тигізіп, ауыл мектептері, денсаулық сақтау мекемелері мен мобильді топтар да сапалы интернетпен қамтылады деген сөз.
Жаслан Мәдиев, ҚР Цифрлық даму, инновациялар және аэроғарыш өнеркәсібі министрі:
- Терминалдарды ауыл шаруашылығы, өнеркәсіп, пайдалы қазбаларды өндіру сияқты экономиканың басқа да салаларында тиімді пайдалануға болады. Министрлік байланыс саласындағы уәкілетті орган сондықтан байланыс сапасы мен қамтамасыз етуге жауапты. Оның ішінде әлемдегі жаңа итехнологияларды енгізу жұмысы да бар. Әрине Спейс Экс компаниясының Қазақстан нарығына келуі тек оң өзгеріс әкеледі.
Қазір өңірлерде көбінесе 4G мобильді интернет пен оптикалық кабель арқылы таралатын кең жолақты интернет қолданыста. Жылдамдық орта есеппен 20 мегабиттен 100 мегабитке дейін, ірі қалаларда — 500 мегабитке дейін жетеді. Алайда бұл көрсеткіш әр аймақта әртүрлі. Цифрлы кеңістіктің дамуы айти индустрияның өсуіне, онлайн білім беру мен электрондық коммерцияны ілгерілетуге және экономиканың басқа да маңызды салаларына оң әсер етеді. Телекоммуникация саласын дамыту Министрліктің басты басымдықтарының бірі. Сондықтан байланыс сапасын жақсарту жұмыстары алдағы уақытта да жалғасады.
