Араб Әмірліктерінде жүздеген отандасымыз елге уақытылы орала алмай отыр, деп хабарлайды 24kz.

Бүгін таңда Қазақстанға қарай бағыт алуы қажет болған бірнеше рейс кейінге шегерілді. Тасымалдаушы компанияға келсек, міндеттемесін толық орындамай, жолаушыларды әбден әбігерге түсірді. Олардың ішінде еңбектеген баладан еңкейген қарияға дейін бар.

Рауан Мыңбай, тілші:

- Иран мен Израиль арасында қайта өршіген қақтығыс Араб түбегі, Орталық Азия және Әзербайжан арасындағы кей әуе қатынасын тоқтатты. Қазақстаннан бөлек, Өзбекстанға да шетелдік компаниялар жолаушы тасымалдап жатқан жоқ. Ал олардың қызметіне алдын ала жүгініп, билет рәсімдеген жандар жоспарын амалсыздан өзгертуге мәжбүр. Таң атқалы Абу-Дабиден Алматы не Түркістан бағытына қарай бірде-бір ұшақ көкке көтерілмеді. Себебі Иран тарапының Израильге қарсы қарымта соққы жасау ықтималдығы жоғары. Әуе компаниялары тәуекелге барып, парсы мемлекеті аумағымен ұшып өтуден тартынып отыр.

Зәуре Дүйсенова, зейнеткер:

- Таңғы 5-те Түркістанға ұшуымыз керек еді. Олар отырғызды. 1 сағат күттік. Әбіржідік. Бері жүрдік, әрі жүрдік. Бізді біреу «қонақүйге апарамыз» деді. Ол да болмады. Сондықтан інімнің үйі бар еді. Соған келдік. Шаршап отырмыз. Бұл не жағдай екенін білмейміз.

Осы сәттің өзінде елімізге бағыт алуы тиіс болған бірнеше рейс кейінге шегерілді. Абу-Дабиде 150-ге тарта отандасымыз әуежай іші мен қонақүй жағалап кетті. Әсіресе, кішкене баламен жүрген отбасыларға қолайсыздық туындады. Бұл жағдайға тасымалдаушы компания өкілдері түсіністікпен қарауды өтінген. Айтуларынша, билет құнын кері қайтару мүмкін емес. «Күтуден басқа амал жоқ», — дейді.

Мәулен Жетпісов, Алматы тұрғыны:

- Билеттеріміз ауысты. Не істерімізді білмей тұрмыз. Мыңдаған адам, бала-шағасымен. Өздері не шешіп жатқанын білмейміз. Енді қайда кетерімізді өзімізді білмей жатырмыз.

Арадағы әуе кеңістігінің жабылуына парсы мемлекетіндегі әскери қақтығыстар себеп. Ал ұшақтардың Иран аумағынан басқа бағыттарды айналып өтуі әзірге қиынға соғады. Рейстердің қай уақытта орындалатыны әзірге белгісіз. Тек арада 1 тәулік өткен соң жағдай қалпына келеді деген болжам бар.

Авторы: Рауан Мыңбай