Екі ел арасында ешқандай түсініспеушілік жоқ, кең ауқымды ынтымақтастыққа жол ашық.
Келелі келіссөзден соң БАҚ өкілдері алдында сөз сөйлеген Қасым-Жомарт Тоқаев осылай деп, кездесуде нақты уағдаластықтарға қол жеткізілгенін мәлімдеді. Мемлекет басшысының айтуынша, тараптар сауда-саттық көлемін арттыру мәселесіне тоқталған. Оған қоса инвестициялық ықпалдастықты тереңдетуге назар аударылды. Қазақстан Словакияға мұнай-газ, уран, азық-түлік өнімдерін экспорттауға дайын. Сондай-ақ энергетика, машина жасау, ауыл шаруашылығы, цифрландыру, туризм саласында бірлескен жобаларды жүзеге асыруға мүмкіндік бар. Әскери-техникалық байланыстың да әлеуеті зор. Президент Транскаспий халықаралық көлік дәлізінің әлеуетін бірге пайдалану жайы да сөз болғанын жеткізді. Одан бөлек еліміз Словакияның су ресурстарын басқару ісіндегі озық тәжірибесін зерделеп, бірлесе жұмыс істеуге дайын.
Қасым-Жомарт Тоқаев, Қазақстан Республикасының Президенті:
– Біз мәдени-гуманитарлық байланысты нығайтудың маңызды екеніне тоқталдық. Словакияда еңбек етіп жүрген Қазақстан азаматтарының әлеуметтік жағдайына және құқығын қорғау мәселесіне ерекше назар аудардық. Сондай-ақ білім саласындағы байланыстарды тереңдету жайын талқыладық. Жастарымыз екі елдің жоғары оқу орындарында білім алып жүр. Олар біздің халықтарымызды одан әрі жақындастыра түседі деп ойлаймын.
