Шығыс Қазақстан облысындағы су айдындарына 30 миллионнан астам шабақ жіберілді, деп хабарлайды 24KZ. Ертіс пен Зайсанда жарты ғасыр бұрын жойылып кеткен бекіре, форель және ақ амур секілді балық түрлері көбейтіледі.
Ауқымды жұмыс мемлекеттік тапсырыс аясында жүзеге асты. Зайсан-Ертіс бассейнін балықтандыруға шамамен 200 миллион теңге бөлінді. Ал Бұқтырма мен Өскемен су қоймаларына балық жіберуді шаруашылықтар мен су электр станциялары өз міндетіне алып, 60 миллион теңгеге жуық қаражат жұмсаған. Балықтардың суға бейімделуін ғылыми-зерттеу институттарының ғалымдары бақылайды. Ал инспекторлар заңсыз балық аулауға қарсы күресті күшейтетін болды. Мамандардың айтуынша, бұл шаралар балық қорын көбейтіп қана қоймай, өңірдің экожүйесін қалпына келтіруге оң әсерін тигізеді.
Гүлнәр Қонарбаева, «Зайсан-Ертіс» облысаралық бассейндік балық шаруашылығы инспекциясы бөлімінің басшысы:
- 2024 жылға дейін біз тұқы тұқымдас балық түрлерін ғана жіберіп келдік. Биыл алғаш рет шаруашылықтарға осы бағыттан сәл ауытқып, бағалы балық түрлерімен балықтандыруды ұсынып отырмыз. Биыл Өскемен су электр станциясы мен «Қазақстан су жолдары» кәсіпорнының Семей филиалы бекіре тұқымдас балық шабақтарын су айдындарына жіберді.
