Қазақстан – Үндістан әріптестігі нығая түседі. Екі жақты қарым-қатынас «Орталық Азия-Үндістан » диалогының аясында кеңеймек.
Еліміздің Сыртқы істер министрі Мұрат Нұртілеу Нью-Делиде өткен IV министрлік кездесуіне қатысып, экономикалық өсім мен аймақтық тұрақтылықты қамтамасыз ету үшін байланысты күшейтудің маңыздылығына тоқталды. Жиын соңында көпжақты ынтымақтастықты тереңдетуге бағытталған Орталық Азия мен Үндістан Сыртқы істер министрлерінің Бірлескен мәлімдемесі қабылданды.
Мұрат Нұртілеу, ҚР Сыртқы істер министрі:
- Астана қазіргі әлемдегі орта державалардың рөлін күшейтуге бағытталған Үндістанның «Ғаламдық Оңтүстік» бастамасындағы Нью-Делидің ұстанымын толық қолдайды. Орталық Азияның да ықпалы артып келеді. Бізде ортақ дүние көп. Соңғы отыз жылда Орталық Азия елдері мен Нью-Дели арасында мазмұнды саяси диалог орнады. Бұл өзара достық пен жемісті ынтымақтастықты одан әрі тереңдетуге жол ашты. Кешегі іскерлік форум барысында біз көлік байланысы, энергетика, ақпараттық технологиялар, денсаулық сақтау, білім беру және бүгін талқыланатын өзге де көптеген салалардағы өзара тиімді ынтымақтастықты тереңдету үшін күш біріктіруге келістік.
