«Отбасы банк» пен Дүниежүзілік банк тобына кіретін Халықаралық қаржы корпорациясы арасында консультациялық кеңес туралы келісімге қол қойылды, деп хабарлайды 24kz.

Рәсім Астана халықаралық форумы аясында «Отбасы банкінің» басқарма төрағасы Ләззат Ибрагимова, «Бәйтерек» ұлттық басқарушы холдингі басқарма төрағасының орынбасары Жандос Шайхы мен IFС-дің Түркия және Орталық Азия бойынша директоры Вибке Шлёмердің қатысуымен өтті. Екіжақты серіктестіктен қандай нәтиже күтіледі?

Рухани Әбдірахман, тілші:

- «Отбасы банк» таяу болашақта мемлекеттік қаржыландыруға тәуелділігін азайтады. Есесіне сырттан капитал тарту тәсілдері жетілдіріледі. Басқарма төрағасы Ләззат Ибрагимова: «Бұл «Отбасы банкінің» стратегиялық трансформациядағы маңызды қадамы», — дейді.

Ләззат Ибрагимова, «Отбасы банк» АҚ басқарма төрағасы:

- Біз үшін салымшыларымыздың классикалық үлгіде көп жылдар бойы 50%-тік бастапқы жарна жинау тәсілімен қатар баспана мәселесін шешудің басқа да құралдарын ұсыну өте маңызды. IFC сарапшыларының тәжірибесіне сүйене отырып, өз өнімдерімізді одан әрі жетілдіру мүмкіндіктерін қарастырамыз.

Келісімнен күтілетін нәтиже көп. Алдымен, IFC 100-ден астам дамушы елмен жұмыс істейтін жаһандық даму институты екенін ескеру керек. Бірлескен жұмыс арқылы «Отбасы банкінің» қаржыландыру тетіктері жетілдіріледі. Сондай-ақ консультациялық бағдарлама аясында несиелік тәуекелдерді бағалау, инновациялық қаржылық қызметтерді әзірлеу көзделген.

Вибке Шлёмер, IFC Түркия және Орталық Азия бойынша директоры:

- Бүгін «Отбасы банкімен» серіктестігімізді нығайтқанымызға қуаныштымын. Сіздер ипотекалық нарықтың дамуына белсенді үлес қосып келесіздер. Халықаралық корпорация ретінде біз үшін осы маңызды істе ықпалдастықтың мәні зор.

«Отбасы банк» жыл басынан бері 26 мыңнан астам қазақстандықтың тұрғын үй жағдайын жақсартуға көмектесті. 535 млрд теңгеге жуық ипотекалық несие мақұлданды. Бұл өткен жылдың осы кезеңімен салыстырғанда 38%-ке көп. Ал жуырда үш миллионыншы депозит ашылып, тұрғындардың Банкке және тұрғын үй құрылыс жинақ жүйесіне сенімі нығайғанын дәлелдей түсті.

Авторлары: Рухани Әбдірахман, Қанат Махмұтов