Бүгін Алматы қалалық мәслихатының ХХХIХ сессиясында депутаттар жергілікті бюджет есебінен қаржыландырылатын аурулар мен дәрілік препараттар тізімін кеңейтуде бір мәмілеге келді, деп жазады Egemen.kz.
Бірауызды шешім үш түрлі нозологиядағы пациенттерге қатысты қабылданды.
Орфандық кеселге душар болғандарды қаржыландыруға жалпы сомасы 128 млн теңге қажет. Қоғамдық денсаулық сақтау басқармасы ұсынған нозологиялар әлеуметтік маңызы жоғары, кей жағдайларда сирек әрі ауыр дерттердің санатына жатады.
Жергілікті бюджет есебінен амбулаториялық деңгейде дәрілік препараттар жүйелі қызыл жегі, қысқа ішек синдромы мен оптикомиелоневрит (Девик ауруы) диагнозы бар пациенттерге жеткізіледі.
«Мұндай кеселге душар болған науқастар үшін заманауи препараттарды қолдану – жай ғана медициналық қажеттілік емес, ауруды тұрақтандырудың, еңбекке қабілеттілікті сақтаудың және мүгедектікке жол бермеудің жалғыз жолы.
Ұсынылған әрбір мәселе – өңір тұрғындарының нақты қажеттілігіне негізделген. Әр санның артында ауыр жағдайға тап болып отырған адамдар мен олардың отбасылары тұр», деді Алматы қаласы Қоғамдық денсаулық сақтау басқармасы басшысының орынбасары Ләйла Иманғалиева.
Орайы келіп тұрғанда, «Халық денсаулығы және денсаулық сақтау жүйесі туралы» Кодексіне сәйкес, 2017 жылдан бері орфандық ауруларымен ауыратын пациенттер қымбат дәрілік препараттармен негізінен мәслихаттардың шешімі бойынша жергілікті бюджет есебінен қамтамасыз етілетінін айта кету керек.
