Жұмыс бар, маман жоқ.
Ұлытау облысында кадр тапшылығы әлі де күн тәртібінен түспей тұр. Қазір мың жарымнан астам бос жұмыс орыны бар. Күн сайын байқаулар жарияланып, хабарландыру берілгенімен әзірге еңбек нарығындағы сұраныс толық қанағаттандырылмай отыр. Сондықтан мансап орталықтары әр сала бойынша еңбек жәрмеңкесін өткізуге көшті.
Арнайы білімі бар кез келген адамның қызметке қол жеткізуіне тең құқық берілген. Бұл мемлекеттік қызмет туралы заңның басты қағидаты. Сондықтан жәрмеңкеде 300-ге жуық бос жұмыс орны түгел ұсынылды. Қызметтің де сан түрі бар. Қатардағы маманнан басшылық лауазымға дейін бақ сынап көруге болады.
Ерлан Ермаханбетов, мемлекеттік қызмет істері департаментінің басшысы:
- 1522 штат бірлігі бар. Соның қазіргі таңда 20 пайызға жуығы бос орын болып есептеледі.күн тәртібіндегі негізгі мәселе осы бос орындарды барынша толтыру. Аталған іс-шараға 15-тен астам мемлекеттік органдар қатысып жатыр. өздерінің бос орындары және де басқа да мәліметтермен толыққанды, өздерінің функционалды міндеттеріне сәйкес, департаменттер немесе жергілікті атқарушы органдар немен айналысатыны туралы мәлімет беруде.
Мемлекеттік қызметке кадрларды тарту мақсатында бірқатар тиімді әдіс енгізілді. Мысалы, оқу нәтижесі жоғары түлектер қызметке конкурссыз қабылданады. Өңірлік жастар кадр резерві бар және конкурстық іріктеудің де жаңа жүйесі қолданылады. Дегенмен мұның өзі өңірдегі кадр тапшылығын шешуге жеткіліксіз, дейді мамандар. Себебі аймақта жастардың көбі өзге өңірлердегі оқу орындарын таңдап, сонда қалып қояды.
Айдар Қойшыбаев, облыстық еңбек мобильділігі орталығының басшысы:
- Жылына орташа есеппен алғанда 6 мыңға жуық бала мектепті бітіріп, оның 4 мыңы басқа облыстарға жоғары оқу орындарына кетеді. Мыңға жуығы жергілікті коледждерге оқуға түсіп, оны бітіргеннен кейін өзіміздің өнеркәсіп саласына жұмысқа орналасып жатыр. қазіргі таңда мемлекеттік қызметке кадр тапшы. Енді оның себептерінің бірі облысымызда тек бір ғана жоғары оқу бөлімі болуы деп ойлаймыз.
Мемлекеттік қызметшілерден бөлек, облыста педагог ұстаздар, құрылысшылар мен полиция қызметкерлерінің тапшылығы да өткір тұр. Мансап орталықтарында 1500-нан астам бос орын бар. Мамандар бұл олқылықты жою үшін өзге өңірлерден мамандарды тартуға басымдық береміз дейді.
Айдар Қойшыбаев, облыстық еңбек мобильділігі орталығының басшысы:
- Біздің мемлекеттік бағдарлама – ерікті қоныс аударумен мамандарды өзіміздің облысқа тартып жатырмыз. Бүгінгі күні 108 адам оңтүстік өңірлерден облысымзға қоныс аударып келді. Оның 28-і тұрақты жұмысқа орналастырылды. Қалғандары отбасы мүшелері, мектеп оқушылары, бала күтімімен отырған кісілер. Енді әрі қарай жұмысты дамытамыз қарқынды.
Жезқазғанда келер жылы шетелдік жетекші білім ордасымен әріптестік аясында университет ашылады. Қаланың тартымдылығын арттырып, өмір сүруге жайлы шаһарға айналдыру мақсатында даму стратегиясы жасалып жатыр. Жоспар жүзеге асса, жастардың да өзге өңірлерге көшуі тиылып, кадр тапшылығын жоюға сеп болады, дейді мамандар.
Елдос Кәкенов, Нұрлан Исмаилов
