Түркістанда балалар арасында асық ату спортынан ел чемпионаты басталды.
Бекзат Саттарханов атындағы спорт кешенінде жалауын көтерген байрақты бәсеке 2015-2017 жылдары туған ұлдар мен қыздар арасында өрбуде. Төрт күнге жалғасатын сайысқа еліміздің 16 өңірінен 100-ге жуық жас спортшы қатысып, өз шеберліктерін шыңдап жатыр. Олардың барлығы өз аймақтарында өткен іріктеу сайысының жеңімпаздары. Чемпионат "Көшпенділердің" асық спорты халықаралық федерациясы бекіткен ережеге сәйкес, ойынның "Бес табан"деп аталатын түрі бойынша өтуде. Жарыстың негізгі мақсаты — ұлттық спортты насихаттап, жасөспірімдер арасында асық ату өнерін дамыту. Ал Қазақстан чемпионаты — жас спортшылардың шеберлігін бағалайтын еліміздегі ең ірі бәсеке. Сонымен қатар бұл сайыс өңірлердегі асық ату спортының даму деңгейін анықтауға мүмкіндік береді, дейді жарысты ұйымдастырушылар. Қазіргі таңда асық ату спортын Азия балалары ойынының бағдарламасына енгізу мақсатында нақты жұмыстар қолға алынған.
Мейіржан Ғалымжанұлы, жарысқа қатысушы /Жамбыл облысы/:
- Менің асық спортын таңдағаным — бұл баланы жастайынан мергендікке үйрететін өте жақсы ойын. Осы спортты таңдайтын балалар көп болсын деймін. Мен облыстарға барып, жүлделі бірінші орын алып жүрмін.
Жомарт Оразов, асық ату спортынан ҚР мемлекеттік жаттықтырушысы:
- Асық ату спорты біздің 20 өңірде федерация жұмыс істейді. Аккредиттелген. Аға жаттықтырушылар бар. Барлық аудандардағы балалар мен жасөспірімдер спорт мектептерінде бөлімшелер ашуға тырысып жатырмыз, ел бойынша. Және орта мектептер бағдарламасын жаздық біз мектептерге, құрал-жабдықпен қамту басталып жатыр.
