Қазақстан мен Ресей алдағы жылдарға арналған ауқымды мәдени бағдарламаны қолға алды.
Жоспарға сәйкес, бірлескен кинофестивальдер, көрмелер және театр жобалары ұйымдастырылады. Осы және өзге де тың идеялар Астанада өткен дөңгелек үстелде екі елдің шығармашылық зиялы қауым өкілдері арасында талқыланды. Кездесуге Қазақстан Республикасының Мәдениет және ақпарат министрі Аида Балаева мен Ресей Федерациясының Мәдениет министрі Ольга Любимова қатысты. Көрші ел делегациясының жасаған сапары аясында қос мемлекеттің мәдени байланысының символы ретінде елордада Қазақстан мен Ресейдің Достық аллеясы салтанатты түрде ашылды.
Қазақстан мен Ресей – Еуразия кеңістігіне қатар қонған қос мемлекет. Тату көрші әрі одақтас елдер. Қазір бұл ынтымақтастық өзара серіктестік сенім мен сыйластықтың берік діңгегіне айналды. Бұл қос мемлекет басшыларының келелі келіссөзінің арқасында қол жеткізілген жетістік. Ал Астанаға Ресейдің мәдениет министрі бастаған делегацияның келуі — мәдени байланыстардың да жоғары деңгейде екенін көрсетеді. Бұл салада бірлескен жобалар мен бірігіп атқарған жұмыстар аз емес.
Бүгінде отандық фильмдер Ресей нарығына жиі шығып, өз көрермендерін тапқан. Ал қазақстандық режиссёрлердің кино картиналары Мәскеу, Санкт-Петербург, Қазан, Сочи және өзге де қалаларда өтетін фестивальдерге қатысып, жүлделер иеленіп жатыр. Соңғы жылдары отандық 10 туынды 22 фестивальде ұсынылған. Өз кезегінде елімізде ресейлік туындылар да көрсетіліп жатыр.
Эльза Антонова, «Роскино» бас директоры:
- Біз биыл күзде Алматыда өтетін Еуразиялық кинонарық аясында бірыңғай стенд әзірлеу мәселесін пысықтауды жоспарлап отырмыз. Сондай-ақ «Роскино» Ресей мен Қазақстанның қатысуымен «Орталық Азия плюс» кинофестивалін ұйымдастыруды көздеп отыр. Жобалар аз емес, олардың сәтті жүзеге асатынына үміт артамыз.
Тараптар музей ісіне де ерекше көңіл бөліп отыр. Алдағы уақытта бірлескен көрмелер өткізіп, екі елдің тарихынан сыр шертетін құнды жәдігерлермен алмасу жоспарланған. Мәселен, қазірдің өзінде Астанада Эрмитаж күндеріне дайындық жүріп жатыр.
Кристина Турбинова, Бахрушин атындағы мемлекеттік орталық театр музейінің бас директоры:
- Біз әріптестігімізді арттыру үшін «Музей ісі мектебі» бағдарламасын іске қостық. Бұл алаңда әріптестерімізбен музей қорын қалай сақтау, тіркеу және жүйелеу қажет екені жөнінде тәжірибе алмасып келеміз. Бахрушин музейінің коллекциясы қазақ театрларының тарихына арналған 5 мыңнан астам бірегей жәдігерді қамтиды. Бұл құнды мұраның басым бөлігі Екінші дүниежүзілік соғыс жылдары жиналған.
Қазақстан мен Ресей арасындағы мәдени байланыс – қос елдің рухани үндестігінің көрінісі. Бұл байланыс тек өткеннің мұрасы ғана емес, болашақтың берік негізі. Соның бір жарқын көрінісі ретінде бүгін елорда төрінде «Мәңгілік достық» аллеясының салтанатты ашылуы да өтті. Шараға қос елдің мәдениет министрлері қатысты. Қонақтар алдында сөз сөйлеген Аида Балаева мәдениет әрқашан халықтарды жақындастыратын көпір болып келетіндігін айтты. Ал «Астана-Опера» театры жанындағы жаңа аллея ұрпақтан ұрпаққа жалғасар сенім мен құрмет, ортақ құндылықтарды сақтау қажеттігін еске салып тұратын символ екендігін жеткізді.
Алексей Бородавкин, Ресей Федерациясының Қазақстандағы Төтенше және өкілетті елшісі:
- Ресей Федерациясының Қазақстандағы Елшілігі бұл аллеяның көркейіп, абаттануына барынша көңіл бөліп, қолдау көрсететін болады. Бұл аллея кездесулер өтетін, мазмұнды пікір алмасулар мен рухани байланыстың ордасына айналғанын қалаймыз. Ол үшін жергілікті әкімдікпен бірге қолдан келгеннің бәрін жасаймыз.
Келелі келіссөз бен маңызды кездесулерге толы болған бүгінгі күн екі ел өнерпаздары қойған концертпен аяқталды. «Астана Опера» театрында Қазақстан мен Ресейдің мәдениет қайраткерлері, халықаралық байқаулардың лауреаттары, академиялық өнер жұлдыздары өнер көрсетті. Бір сахнада қазақтың дәстүрлі күйлері, орыстың романстары мен қос елге бірдей таныс опералық ариялар тоғысты. Бұл кеш өнердің ұлт пен шекара талғамайтын құдіретін тағы бір мәрте дәлелдеген айтулы оқиға болды.
Риат Шони, Ержан Рахманбердиев және Мерей Талап
