Қарағанды қаласындағы қоғамдық көліктің орташа қолданыс мерзімі екі есе қысқарды. Яғни 6 жылға төмендетілді. Былтыр қала көшелеріне 53 жаңа автобус шықты.
Ал биыл тағы 195 көлік қатарға қосылады. Көмірлі өлкеде бұдан өзге іске асып жатқан бастама көп. Тұрғын үйлер салынып, ірі жобалар қолға алынды.
Биыл Қарағанды облысындағы өндіріс ошақтары 4 трлн теңгенің өнімін өндірді. Тартылған инвестиция 9,3 пайызға өсіп, 930 млрд теңгеден асты. Аграрлық секторда құны 47 млрд теңге болатын 31 жоба қолға алынды. Соның бірі – Осакаров ауданындағы тауарлы-сүт фермасы. Оның жылдық қуаты – 55 мың тонна.
Ермағанбет Бөлекпаев, Қарағанды облысының әкімі:
- Аграршылар егіс алқаптарын, оның ішінде майлы дақылдар алқаптарын 78 мың гектарға дейін ұлғайтты. Бұл өткен жылмен салыстырғанда екі есеге артық. Жемшөп дақылдары 55,5 мың гектарға дейін ұлғайтылды.
Жыл соңына дейін облыста 548 мың шаршы метр тұрғын үй салынады. Сондай-ақ Президенттің тапсырмасы аясында ауылда 92 медициналық нысан тұрғызылды.
Ермағанбет Бөлекпаев, Қарағанды облысының әкімі:
- Биыл ауылдық ауруханаларға 67 жас дәрігер жұмысқа келді. Біз 8,5 млн теңгеге дейін көтерме жәрдемақы түрінде қолдау көрсетеміз. Қаржыландырудың жалпы сомасы 419 млн теңгені құрайды. Сонымен қатар 2023 жылдан бастап медицина қызметкерлеріне 250 пәтер берілді.
Биыл облыстағы 9 500 үйге көгілдір отын жеткізілді. Өңір тұрғындарының 98,7 пайызы сапалы ауызсумен қамтылды. Бұдан бөлек, 6 мектеп бой көтеріп, 637 шақырым жол жөнделді.
Авторы: Нұрқанат Қанапия
