Әйгілі америкалық әнші Дженнифер Лопестің Алматыда өтетін концертіне билеттер сатыла бастаған сәттен-ақ қазақстандықтар жаппай сатып алуда. 2025 жылдың 28 мамырында концертке билеттердің ресми сатылымы басталды, деп хабарлайды Egemen.kz.
Сатылым ашылған алғашқы минуттарда сайтқа кірушілер саны күрт өсіп, жүйе электронды кезек күтіп тұрған адамдардың санын көрсетті. Мәселен, сайтқа кіру үшін кезекте 15 мыңнан астам қолданушы тұрса, нақты билет сатып алып жатқан адам саны небәрі 35 болған.
Ticketon пайдаланушыларға бетті жаңартпауды және жаппауды ескертті. Мұндай әрекеттер электронды кезектен автоматты түрде шығарып тастайды.
«Дженнифер Лопестің концертіне билеттер төмендегі батырма арқылы қолжетімді. Немесе бірнеше минут күткеннен кейін сіз автоматты түрде Ticketon-ның басты бетіне өтесіз. Егер бұл парақшадан шығып, 10 минут ішінде қайта оралмасаңыз, кезегіңіз жойылады», делінген сайттағы хабарламада.
Билеттердің бағасы 40 мың теңгеден басталады (трибуна), ал VIP, FAN және DANCE-аймақтарға кіру 90 мың теңгеден жоғары. Әлеуметтік желі қолданушыларының айтуынша, сатылым басталған алғашқы сағат ішінде ең танымал орындар лезде сатылып кеткен.
Айта кетейік, бұған дейін «Астана Концерт» продюсері Мәлік Хасенов Астанадағы концертке билеттердің сатылымы 11 сәуірде басталатынын хабарлаған. Ол күні сайтқа кіру мүмкін болмай, техникалық қиындықтар орын алған еді.
Жанель ТӨЛЕУБЕКОВА, ЕҰУ студенті
