Мәжіліс депутаты Асхат Аймағамбетов балалық шағы қалай өткенін айтты, деп хабарлайды Skifnews.kz ақпарат порталы.
Депутат Khabar арнасына берген сұқбатында бала кезінде уақытты қалай өткізгенін есіне алды.
Балалық шағым ауылда өтті. Мен үшін ең тәтті, ең қымбат естеліктер балалық шағыммен байланысты. Ең алдымен ауылдың жазы, анам пісірген таба нанның иісі. Анам таңертең сиыр сауғаннан кейін сепаратормен сүт тартатын. Соның қаймағына жаңа піскен ыстық нанды тоса қалып жейтінбіз. Оның дәмі әлі күнге дейін аузымда тұр, — дейді Аймағамбетов.
Ол жазда үйінде құрт та жасалғанын есіне алды.
Құртты шатырдың үстіне жайып қоятын. Шатырға шығып, құрт алып жейтінбіз. Оған қоса қой да бағатынбыз. Қой бағу қазір шытырман оқиға сияқты ғой, бірақ ол кезде естен кетпейтін сәт еді. Сөйтіп қой кезегінде қой бақтық. Кешке мал түгел болмаса, басқа үйдің қорасынан қой іздейтінбіз. Міне біздің балалық шағымыз осылай өтті, — деді депутат телеарнаға берген сұқбатында.
