Талдықорғанда полицейлер өртеніп жатқан үйден ер адамды құтқарды, — деп хабарлайды Massaget.kz тілшісі Polisia.kz-ке сілтеме жасап .
Кешке полицейлерге көршілердің шулағаны туралы хабар түскен.
Тәртіп сақшылары "Жастар-3" ықшамауданына келген сәтте, үйлердің бірінің шатыры отқа оранғанын байқады.
Көршілердің айтуынша, үйдің ішінде ер адам болған. Полиция қызметкері үйдің шатырына көтеріліп, қою түтін мен жалын арасынан ер адамды байқады. Тұрғынды қолына көтеріп алып, өртеніп жатқан шатырдан секіріп түсті.
Полицей жеңіл түрде түтіннен уланса да, ауруханаға жатудан бас тартып, қызметін жалғастыруды жөн көрді. Тілсіз жаудан аман қалған ер адам қазір дәрігерлердің бақылауында.
Өрттің шығу себебі анықталып жатыр.
Instagram парақшамызға жазылып, ең қызықты ақпараттарды бірінші болып оқыңыз!
