Мемлекет басшысы Қасым-Жомарт Тоқаевтың бастамасымен жасалып жатқан реформалар елдің қоғамдық-саяси өміріне серпіліс әкелді .
Бұл өзгерістер мемлекеттің демократиялық даму бағытын анықтап, билік пен халық арасындағы сенімді нығайтуға бағытталған. Биыл алғаш рет Семейде қала әкімін халық өзі таңдайды. «Күшті Президент – ықпалды Парламент – есеп беретін Үкімет» принципі ел өмірінің негізіне айналды. Бүгін Семейде 128 сайлау учаскесі сағат 07:00-ден бастап жұмыс істеуде. Әрбір азамат өзінің таңдауын жасау үшін арнайы белгіленген учаскелерге келіп, сайлау процессіне белсенді қатысып жатыр.
Соңғы жылдары еліміздегі саяси реформалар сайлау мәдениетін түбірімен өзгертті. Қазір әр азаматтың пікірі мен таңдауы ерекше мәнге ие болып отыр. Президент Қасым-Жомарт Тоқаев ұсынған «Халық үніне құлақ түретін мемлекет» концепциясы нақты іске асып жатыр. Семейде өтіп жатқан қала әкімін сайлау барысы да осы сөзіміздің айғағындай. Айта кетейік, қаладағы сайлау учаскелері сағат 07:00-ден 20:00-ге дейін жұмыс істейді.
Гүлжан Қуанышева, Семей қаласы Аумақтық сайлау комиссиясының төрайымы:
- Сағат 20:00-де барлық сайлау учаскелері жабылып, дауыс берген бюллетеньдерді санау басталады. Екі тілде хаттамаларын толтырады. Одан кейін құжаттарын жинап, аумақтық сайлау комиссиясына жеткізіледі. 128 сайлау учаскесі бізге жетіп, есебін бергенше өте ұзақ процесс. Заң бойынша сайлау қорытындысын жасауға үш күн мерзім бар.
«Сайлау — мемлекет пен қоғам арасындағы негізгі демократиялық көпір. Әрбір азамат науқанға қатысу арқылы өзінің пікірін білдіріп, елдің дамуына өз даусымен тікелей ықпал етеді. Бұл тек құқық қана емес, терең азаматтық жауапкершілік»,-дейді жастар.
Сернад Қалиев, Семей қаласының тұрғыны:
- Абай өңірі Семей қаласы үшін тұңғыш рет халық болып әкімімізді таңдап жатырмыз. Сондықтан жастарға, барлық қала тұрғындарына шараға қатысуы керек. Себебі бұл біздің болашақ демократиялық қоғамды қалыптастыруға үлкен үлес қосады. Сондықтан біз достарыммен осындай шараға келіп отырмыз. Дұрыс таңдау жасадым деп ойлаймын.
Сайлау учаскелерінде барлығы 220 мыңнан астам адам тіркелген. Таңертеңнен бері дауыс беруге келген адамдардың қарасы қалың болып, семейліктердің белсенділігі ерекше байқалды. 7 баланың анасы Анар Сүлейменова бүгін үш баласымен бірге келіп, Семейдің болашағы үшін таңдау жасады.
Анар Сүлейменова, көпбалалы ана:
- Дауыс беруге отбасыммен және балаларыммен келдім. Негізі балаларға дауыс беру керек деп үнемі айтамын. Біз Қазақстан Республикасының азаматы болған соң, қалаға қандай кандидат керек екенін білеміз. Көп бағдарламасы ұнаған соң өз кандидатымды таңдадым.
Аумақтық сайлау комиссиясына үш үміткер тіркелген. Тіркелген кандидаттарға өз бағдарламаларын сайлаушыларға таныстыру үшін 10 қазан сағат 00.00-ге дейін уақыт берілді. 11 қазан тыныштық күні болды. Ол уақытта заңға сәйкес кез келген үгіт-насихатқа тыйым салынған. Бүгін Семей халқы сайлауға белсенді қатысып, таңдауларын жасап жатыр.
Авторлары: Рүстем Қайратұлы, Мәди Базарбеков
