Жетісу облысының тұрғыны саумалдан балмұздақ жасайды. Әзірге тіл үйіретін тәттіні жақындары мен көрші-көлеңдеріне әзірлеп береді.

Енді ол ұлттық сусынды өңдеп, өскелең ұрпақтың денсаулығын нығайтатын жаңа кәсіп ашуға ниетті.

Райгүл Зәкәрияқызы төрт жылдан бері күніне бес уақыттан бие сауады. Саумал қалайтындардың көбі үлкен кісілер. Ұлттық сусыннан балалар да нәр алып қуаттансын деген оймен қаймақ пен бал қосып балмұздақ жасайды.

Райгүл Зәкәрияқызы, Сарқан қаласының тұрғыны:

- Саумал — қан тазалайды. Адамның денсаулығын оңшайды. Әрқандай нәрсеге пайдалы. Асқазан ауруына да пайдалы. Сондықтан өзім ойластырып саумалдан балмұздақ жасасам, балалар сүйіп жейді ғой деп, «Балалардың тамағы» деген жобамен шығарып көрейін дедім. Ол үшін осы техниканы алып, жобамды іске асырып ашамын.

Отбасы бұл кәсіпті сексеннің сеңгіріне шыққан Данышпан қарияға саумал сауып беруден бастаған. Кейін бие санын арттырып, ірі қара да алды. Қазір ауыл тұрғындарына қымыз, құрт, май ірімшік сатып нәпәқасын айырып отыр.

Данышпан Әбдікерімұлы, Сарқан қаласының тұрғыны:

- Қошына — қорымызды бүкіл саумалымен, қымызымен қамтып отыр. Балалардың арқасында. Таң атысымен күн батқанға дейін Астанаға шейін күнделікті жолдап жатыр.

Райгүл Зәкәрияқызы ісін өркендету үшін «Бір ауыл бір өнім» жобасына қатысып жатыр. Жеңімпаз атанса кәсіпкер ретінде тіркеліп, шағын цех ашпақ. Өңірде осы конкурстың қатысушыларын қолдауға арналған жаңа бағдарлама жасалды.

Ерқанат Қажымұқанұлы, кәсіпкерлік және ИИД басқармасы басшысының орынбасары:

- Қазіргі таңда жергілікті бюджеттен 50 млн теңге бөлінді. Сонымен қатар «Даму» қолдау қорынан қосымша 100 млн теңге бөлініп, 150 млн теңгеге осы «Бір ауыл бір өнім» жобасының қатысушыларының барлығын қамтып, осыларға несие береміз. Былайша мемлекеттік қайтарымсыз грант бірінші деңгей болса, екінші деңгейде жобаны іске асыру үшін 15 млн-ға дейін несие беріледі. Аз пайызда.

Сала жауаптылары «Жетісу облысында шағын және орта бизнес саны 60 мыңнан асып, олар жалпы өңірлік өнімнің 41 пайызын шығарып отыр»,- дейді.

Авторлары: Шыңғыс Қалиден, Қуаныш Түргенбаев, Айгүл Ғазизулина