Әзербайжандағы «Дауыс» танымал ән байқауына қатысқан Санат Асуат үшінші орынды жеңіп алды.
20 жастағы отандасымыз әлемдік хиттермен қоса қазақ әндерінде орындап, қазылар алқасын тәнті етті. Санат дауыс беруде көрерменнің 20 пайыз дауысына ие болды. Талантты қазақ қызы финалда әзербайжанның "Сенден нигаранам" әнін тамаша орындаған. Санат Асуат "Еуровижн"-2011" жеңімпазы Елдар Гасымовтың тобында болды. Қазір жерлесіміз Темірбек Жүргенов атындағы Ұлттық өнер академиясының "Эстрадалық вокал" мамандығы бойынша үшінші курста оқиды.
Елдар Гасымов, жоба тәлімгері:
"Санат Асуат бір-біріне ұқсамайтын 3 түрлі мәнерде ән айтты. Менің ойымша, оның ақтық сындағы өнері өте әдемі болды. Оны мақтан тұтамын. Ана тілі емес, бөтен тілде әрі жат елде жоғары деңгейде ән айту батылдықты қажет етеді".
Санат Асуат, әнші:
"Осы кезеңге жету мен үшін үлкен мәртебе. Әр қолдау көрсеткен адамға алғысым шексіз және де Қазақстанның Әзербайжандағы елшілігіне үлкен алғысымды білдіремін".
Байқаудан кейін Санат Асуатпен Қазақстанның Әзербайжан елшілігінде кездесу өтті. Бакудегі ән байқауы ақпанда басталды. Бірінші және екінші орынды жергілікті өнерпаздар алды.
Әлім Байел, Қазақстанның Әзербайжандағы елшісі:
- Санат біздің мақтанышымыз. Қазақ халқының мақтанышы. Қысқа уақыт ішінде ол Әзербайжан халқының жүрегіне жол таба білді. Өзін мойындата білді. Біздің достарымыз, Қазақстанның Әзербайжандағы достары Санатқа жанкүйер болды. Бұл да әзербайжан және қазақ халқының арасындағы достық пен бауырластықтың дәлелі деп айтсақ болады.
