Павлодар облысының Ақтоғай аудандық ауруханасында «Таза Қазақстан » экологиялық акциясы өтті.
Медицина қызметкерлері ақ халаттарын қолғап пен қоқыс дорбасына алмастырып, аурухана аумағын тазалады. Акция барысында AMANAT партиясының мүшелері мен дәрігерлер бірлесе қоқыс жинап, жиек тастарды әктеп, гүлзарларды абаттандырды. Бұл шара тек аурухана ауласын көркейту емес, тазалық мәдениетін қалыптастыруға бағытталған игі қадам. Дәрігерлердің айтуынша, мұндай бастамалар ауыл тұрғындарына үлгі болып, қоғамда экологиялық жауапкершілікті арттырады.
Назерке Омарова, Ақтоғай аудандық ауруханасының дәрігері:
- Таза Қазақстан акциясы бұл жай ғана ұран емес, қоршаған ортаны болашақ ұрпаққа сақтап қалуға және де таза орта, таза табиғат денсаулықтың кепілі деп білеміз. Біздің Ақтоғай аудандық ауруханасында сенбілік әр апта сайын өтіп отырады.
