Полигондар климаттың өзгеруіне де ықпал етеді екен. Еуропалық ғарыш агенттігіне тиесілі Sentinel-5 спутнигінің көмегімен зерттеу жүргізген ғалымдар осындай тұжырымға келген. Атап айтқанда, тропосфераны бақылай келе, әлемдегі қоқыс полигондарынан метанның шамадан тыс көп бөлінетінін анықтаған.
Бұған дейін қалдықтардан бөлінетін метан үлесі 11–20% деп есептеліп келген еді. Енді бұл көрсеткіштің тым жоғары екені анықталды. Яғни, полигондардағы метанның ауаға бөлінуі ресми деректерден әлдеқайда артық болып шықты. Бұл газдың 20 жылдағы әсері көмірқышқыл газынан 80 есе асып түседі екен. Атмосферада 10 жыл бойы сақталатындықтан метанның жаһандық жылынуға әсерін тигізбей қойматыны анық. Сол себепті ғалымдар жаһандағы қоқыс полигондарын басқару ісін өзгерту қажеттігін айтып, дабыл қағып отыр.
