Ақмола облысында егін орағы қызу жүріп жатыр, деп хабарлайды 24kz.
Бүгінге дейін өңір шаруалары 2,5 млн тонна өнім жинаған. Орташа өнімділік гектарына 14 центнерден айналып отыр. Дегенмен, бұдан 2 есе көп өнім алып жатқандар да бар.
Абзал Азаматұлы, тілші:
- Тәжірибелі механизатор Сағат Шәкіровтің күнделікті жұмысы осылай басталады. Ол алдымен техникасын тексереді. Қажет жерін майлап, жұмысқа сайлап қояды. Содан кейін ғана егін оруға шығады. Ол осы салада 30 жылдан астам уақыт еңбек етеді. Биыл механизаторға жаңа техника беріліпті.
Сағат Шәкіров, механизатор:
- Жаңа техниканың аты жаңа ғой. Ішінде барлығы қарастырылған. Қуаты жағынан да мықты. Осының арқасыда қазір тәулігіне бір механизатор 60-70 гектар алқаптан дән жинайды.
Жалпы Журавлевка-1 серіктестігі биыл 92 мың гектар алқапқа дән сепкен. Қазір соның тең жартысына жуығы жиналыпты.
Қуантай Сұлтанов, «Журавлевка-1» серіктестігінің атқарушы директоры:
- Егіннің түсімі әр егін алқабында әртүрлі. Бір егін алқабынан 69,9 центнерден алдық. Бір егін алқабынан 54 центнер. Орташа есептесек 28-30 центнер болады. Биылғы астық сапасы өте жақсы болып тұр.
Ардақ Смайылов, Бұланды ауданының әкімі:
- Бұланды ауданында орақ науқаны қарқынды түрде жүріп жатыр. Қазіргі уақытта 23 центнер гектардан орып, алып жатырмыз. Бұланды ауданы бойынша 31% егін жиналды.
Қазір өңірде 66 астық сақтау қоймасы өнімді қабылдап жатыр. Оның жалпы сыйымдылығы 4,3 млн тонна. Жалпы биыл аграрлы аймақта 5,5 млн гектар алқап игерілді. Диқандар бәрі жақсы болса, 7 млн тоннаға жуық астықты қамбаға кұюды көздеп отыр.
Авторлары: Абзал Азаматұлы, Виктор Полянный
