Мемлекет басшысы өз Жолдауында командаларды қарамағына алған кәсіпкерлерге алғысын айтып, ризашылығын білдірген еді. Сәйкесінше, жекешелендіруге қатысты жұмыстарды тездету керектігін тапсырды. Сонымен, қай клубтар жекенің қолына өтіп жатыр?
Футболға бөлінетін қаржы – елдегі ең өзекті мәселелердің бірі. Соңғы 7 жылда 18 клубқа 200 млрд-тан астам ақша жұмсалды. Президент аталған мәселені шешу үшін жыл сайын ел қазынасынан бөлінетін млрд-тарды қысқартып жатыр. Одан бөлек клубтарды жекешелендіруге көңіл бөлу керектігін бірнеше рет атап өтті.
Қасым-Жомарт Тоқаев, ҚР Президенті:
- Футбол клубтарын жекешелендіруге қатысты жұмысты тездету керек. Қазір еліміздің 4 футбол клубына белгілі кәсіпкерлеріміз ие болды. Яғни клубтар жекеменшікке өтіп жатыр. Сол үшін оларға ризашылығымды білдіремін. Дегенмен футболды коммерцияландыру ісін жалғастыра беру керек. Мұндай қадамсыз Қазақстанда футбол дамымайтынын әлемдік тәжірибеден көріп отырмыз. Қазіргі заманда кәсіби спортты қомақты табыс әкелетін бизнес-индустрия ретінде қарастырған жөн.
Президент айтқандай, қазір еліміздің 4 клубы жекешелендіріліп жатыр. Олардың арасында қарағандылық "Шахтер" мен петропавлдық “Қызыл-Жар” және елордалық “Жеңіс” пен қызылордалық “Қайсар” командалары бар. Мәселен, белгілі кәсіпкер Тимур Турлов 1-ші лигада ойнайтын “Шахтерға” жетекшілік ететін болды.
Тимур Турлов, Қарағанды облысы Футбол қауымдастығының президенті:
- Менің міндетім Қарағанды облысын қазақстандық футболдың көшбасшыларының қатарына қосу. “Шахтерды” қолдап, ойымызды жүзеге асыру үшін бар күшіміздің саламыз. Біз осы клубқа академия салып жатырмыз. Бұр үрдіс болашақта жас футболшылардың әлеуетін ашуға мүмкіндік береді. Сол арқылы тек еліміздің емес Еуропаның маңдайалды клубтарының қатарына қосыламыз деген үміттемін.
Одан бөлек “Жеңіс” клубын Михаил Ломтадзе қол астына алса, “Қызыл-Жар” Сергей Канға және “Қайсар” клубын Исламғали Қозбақов басқаратын болды. Ол Қызылордадағы заманауи футбол академиясының құрылысына шамамен 12 млрд теңге салуды жоспарлап отыр.
Мейрам Сапарғалиев, ҚР Туризм және спорт министрлігі спорт және дене шынықтыру істері комитетінің ресми өкілі:
- Бұл енді футболды жекешелендіруге байланысты айтылған президенттің пікірі де, тапсырмасы да өте орынды. Бұл бәсекелестікке қабілеттілікті арттыруға және өз алдына дербес дамыту бағыттарын құруға септігін тигізеді. Бірінші кезекте ішкі менеджментті қалыптастыру. Екінші кезекте сыбайлас жемқорлықтың алдын алу. Жекешелендірілгеннен кейін әлбетте ішкі менеджментін дамытуға, сапасын арттыруға кәсіпкер ретінде қызығушылығы өз мойнына артылатын болады.
Иә, клубтарды жекешелендіру арқылы мемлекеттік бюджеттен бөлінетін млрд-таған ақшаны үнемдеуге болады. Сондай-ақ, бұл жоба — қазақ футболын жаңа деңгейге көтеруге бағытталған тарихи қадам. Егер инвесторлар шынымен жанкүйерлердің үмітін ақтап, клубтарды дамытуды мақсат етсе, алдағы 10-15 жылда қазақ футболы жаңа дәуірге аяқ басуы мүмкін.
Авторлары: Мерей Қанапия, Ержан Қанапия
