Перудің солтүстігіндегі Трухильо қаласында күшті жарылыс болды.
Кемінде 11 адам жарақат алып, 30 үй қирап қалды. Бұл — биыл қалада тіркелген үшінші оқыс жағдай. Қаңтарда Бас прокуратура ғимаратында бомба жарылды. Тамызда көшедегі дүмпуден 10 адам жараланып, 25 үй бүлінген еді. Полиция екі күдіктіні қолға түсірді, олардың бірі — Венесуэла азаматы. Қазір оқиға болған жерде құлаған қабырғаларды тазалау жұмысы жүріп жатыр. Билік тағы екі үйдің құлап кету қаупі барын ескертті. Жалпы Перуде қылмыс өршіп тұр. Кісі өлтіру мен бопсалау көбейген. Жергілікті БАҚ дерегінше, күн сайын үйлерге, автобустарға, мейрамханалар мен мектептерге бағытталған қарулы шабуыл жиіледі.
