Еліміздің 15 өңірінде күзгі орақ науқаны жүріп жатыр. Бүгінгі күнге дейін 2 млн тоннадан артық астық жиналған. Ал Ақмола облысында толассыз жауған жаңбыр диқандардың жиын-терімге толық кірісуіне қолбайлау болып тұр. Шаруалар әзірге тек 130 мың гектар алқаптан өнім алып үлгерген.

Бибінұр Әмірханқызы, тілші:

Былтыр рекордтық көлемде астық жинаған ақмолалық диқандар биыл да мол өнімнен үмітті. Себебі, жаз жайлы болды, — дейді. Бидай толық пісіп жетілген. Алайда соңғы аптада толассыз жауған жаңбыр жиын-терімге кедергі боп тұр. Қазір күн ашылды. Шаруалар енді жердің кепкенін күтіп отыр.

Бурабайлық диқан Болатбек Асенов шамадан тыс жауған жаңбыр бидайдың сапасын 4-классқа түсіреді деп алаңдаулы. Шаруашылық тұқым дайындаумен айналысады, сондықтан бидайдың сапасына үлкен мән береді. Биыл тәжірибе жүзінде бидайдың 11 сортын еккен. Сөйтіп, солтүстік өңірдің ауа райына бейім, үздік сортты іріктеп шығарғысы келеді.

Болатбек Асенов, шаруа:

Техникамыз толық дайын. Алайда өткен жұмада 90 мм жауын жауды – екі айдың мөлшері небәрі бес күнде түсті. Соның салдарынан егістік батпаққа айналып, жұмысқа шыға алмай отырмыз. Бұл жағдай өнім сапасына әсер етіп, үшінші класс орнына төртінші класс болуы мүмкін.

Ылғалды молынан сіңірген астық шіріп кетпеуі үшін тезірек жинап алған жөн. Оны кептіру тағы бар.

Нұрбек Бадырақов, облыстық Ауыл шаруашылығы және жер қатынастары басқармасының басшысы:

Жалпы сыйымдылығы 4 млн 300 мың тонна және қосымша 2 млн 900 мың тонна болатын 1500 агроқұрылымның астық қоймалары осы іске жұмылдырылады. Нәтижесінде жалпы сыйымдылық 7 млн 200 мың тоннаға жетіп, облыста өндірілген астықты толық сақтауға мүмкіндік береді.

Ал еліміз бойынша 30 млн тоннадан астам астықты сақтайтын орын бар.

Жандәулет Жаңбырбаев, ҚР Ауыл шаруашылығы министрлігі егіншілік департаменті директорының орынбасары:

Қазір 2,2 млн тонна астық лицензияланған қабылдау орындарында сақталуда. Сонымен қатар 11 млн тонна сыйымдылық бос тұр. Жалпы алғанда, ешқандай тапшылық жоқ.

Үкімет күзгі дала жұмыстарын кешеуілдетпеу үшін ақмолалық шаруаларға 76 мың тоннадан аса жанар-жағармай жөнелткен. Жалпы биыл диқандарды қолдауға мемлекеттен мол қаражат бөлінді. Өңірдегі мыңға жуық агроқұрылым иелері 117 млрд теңге көлемінде жеңілдетілген несие алған. Сондықтан шаруалар науқанға дайын. Тек, күн райы қолайлы болса болғаны, 5 жарым млн гектарға себілген астықты бір айда шашау шығармай жиналып алмақ.

Бибінұр Әмірханқызы