Биыл Конституциясының қабылданғанына — 30 жыл. Ел тәуелсіздігінің басты тірегі саналатын құжат 1995 жылы жалпыхалықтық референдум арқылы қабылданды. Содан бері мемлекеттің дамуы мен тұрақтылығына Ата заң негіз болды. 30 жыл ішінде Конституция бірнеше мәрте өзгеріп, заман талабына сай жаңартылды.

30 жылда Конституция ел өмірінің барлық саласына елеулі өзгерістер әкелді. Осы уақыт аралығында негізгі заңға 6 рет түзету енгізілді. Әр өзгеріс – қоғамдағы сұраныс пен заманауи талаптарға сай жасалды. 1998 жыл. Парламент пен Президенттің өкілеттік мерзімі ұзартылып, депутаттардың саны көбейді. Сонымен қатар, президенттікке үміткердің жас шектеуі өзгертілді. 2007 жыл. Саяси реформалар кезеңі. Партиялық тізіммен сайлау жүйесі енгізілді. Президенттің кейбір өкілеттігі Парламентке беріліп, билік тармақтары арасында тепе-теңдік орнады.

Жанна Шаяхметова, Заң ғылымдарының кандидаты, профессор:

ҚР Конституциясына өзгерістер енгізу бұл – заман талабы. Әрбір белгілі бір заңдарды қабылдаған уақытта оның негізі осы конституциялық нормадан алынады. Сондықтан біз кез келген заңды іске асыру үшін ең бірінші ол конституцияда қаралып отыр ма, конституцияның бастауы қандай болып отыр, міне осыған сүйенуіміз керек.

Ең ауқымды өзгерістер 2022 жылы енгізілді. Жаңа Қазақстан идеясына сай суперпрезиденттік модельден парламенттік республикаға бет бұрды. Конституцияның 30-дан аса бабына түзету енгізілді. Өлім жазасы біржола жойылды, Конституциялық сот қайта құрылды, президенттің туыстарына лауазымды қызмет атқаруға тыйым салынды.

Лесқали Бердіғожин, тарихшы:

Ең бастысы – мемлекеттің тірегі халық, ал бүкіл байлық та халықтың еншісінде. Сондай-ақ еліміздегі әлеуметтік, саяси және экономикалық дамудың негізі болып саналатын баптардың барлығы өзгертілді.

Конституция барлық азаматқа тең мүмкіндік беріп, әділетті қоғамның негізін қалады. Бұл – тұрақтылық пен бірліктің, даму мен өркендеудің басты тірегі саналады.

Нұрсұлтан Нұрсейіт, тілші:

30 жыл ішінде Конституция Қазақстан халқының бірлігін, құқықтарының қорғалуын және болашаққа деген сенімін қалыптастырды. Бұл – әр азаматтың еркін өмір сүруіне берілген кепіл. Негізгі заң – елдің жүрегі. Оны құрметтеу – бәріміздің ортақ міндетіміз.

Нұрсұлтан Нұрсейіт