Кеше елорданың көпқабатты үйінің 9-қабатынан 6 жастағы бала құлап кетті. Абырой болғанда, екінші қабаттың күнқағарына ілініп, аман қалды. Қазір ол ауруханада ем қабылдап жатыр. Бірақ бұл – еліміздегі жалғыз оқиға емес, деп жазады Skifnews.kz ақпарат порталы.
Ресми дерекке сәйкес, жыл басынан бері Қазақстанда балалардың терезеден құлауына байланысты 158 жағдай тіркелген. Соның ішінде 137 бала жарақат алған, ал 21 бүлдіршін көз жұмған. Астана – бұл қайғылы статистикада көш басында. Қалада 52 оқиға тіркеліп, оның 39-ында балалар жарақат алып, 13 жағдайда өліммен аяқталған.
Соңғы айларда мұндай оқиғалардың саны 85 пайызға дейін өсіп, мәселе республикалық деңгейде ерекше назарға алынды.
Астана қаласы Төтенше жағдайлар департаменті бастығының орынбасары Қанат Алтынбеков бұл мәселеге ата-аналардың жауапкершілігі тікелей әсер ететінін айтады:
«ҚР заңнамасына сәйкес, балаларды қараусыз қалдыруға болмайды. Терезеден құлау оқиғаларының алдын алу үшін, әсіресе жоғарғы қабаттарда орналасқан пәтерлерде терезелерге арнайы блокираторлар мен қорғаныс құралдарын орнату қажет», – дейді ол.
Балаларды қараусыз қалдыру – заң бұзушылық. Әкімшілік құқық бұзушылық кодексінің 127-бабына сәйкес, мұндай жағдайда ата-анаға 10-нан 20 АЕК (шамамен 36 900 – 73 800 теңге) айыппұл салынады. Бір жыл ішінде қайталанса, айыппұл көлемі 30 АЕК-ке дейін өседі.
Ал балаға ауыр зиян келсе немесе ол қаза тапса, іс Қылмыстық кодекстің 119-бабы бойынша қаралады:
100 АЕК айыппұл немесе 45 тәулікке дейін қамау;
Ауыр жарақат немесе өлім жағдайында – бірнеше жылға бас бостандығынан айыру.
Мұндай оқиғалар ата-ананы ата-ана құқығынан айыруға да негіз болуы мүмкін. Заң бұл жауапкершілікті тікелей ата-анаға жүктейді.
