Кейінгі кездері ел ішінде, әсіресе психологияға қызығушылар арасында визуализация жасау, яғни ойдағы арман-мақсаттарды қиялда елестету кең тарауда.
Осы ретте Нұр-Мүбәрәк университетінің оқытушысы, араб тілінің маманы Құрманғазы Садыбаев Жанар Байсемізге берген сұхбатында визуализацияға қатысты сұрақтарға жауап берді, деп хабарлайды, Caravan.kz медиа порталы.
Оның айтуынша, қиялдау мен елестету дінге қайшы емес.
”Алла тағала адамға көп нәрсеге мүмкіндіте, сыртқы, ішкі күштер берген. Сондықтан, визуалдау арнайы бір жерде отырып, өзінің жеткісі келетін арманын, деңгейді елестетсе, дінге қайшылығы жоқ. Мысалы, құранда осы жерде ишарат бар. Біз негізі әлі құранды түсіне алмай жатырмыз ғой. Көбіне орта ғасырлық тәпсірлерге сенеміз. Ал негізі құран қияметке дейін жарайтын кітап. Неге біз орта ғасырдың ғана түсінігімен қалуымыз керек? Адам әр заманда ойлау, ақылға келтіру, білім іздеу секілді нығметтерді пайдалану керек. Құранда Адам ата мен Хауа анамызға ағашқа жақындамаңдар деп айтады. Олай жасайтын болсаңдар, залым боласыңдар дейді. Неге Алла тағала жақындамаңдар деген сөздің орнына сол ағаштан жемеңдер деген сөзді қолданбады деп ойлануымыз керек? Жақындау немен болады? Мысалы, жұмысқа баратын кезде үйде отырып, қалай баратыныңызды бір елестен өткізіп аласыз. Көлік жүргізіп келе жатсаңыз, бағдаршамды күтіп тұрған кезде жасыл жанғанға дейін қалай бұрылатыныңызды елестен өткізесіз. Адамға сондай мүмкіндік берді ғой. Қайтадан аятқа келсек, Адам ата мен Хауа анамыз тыйым етілген ағашқа жақындады. Қалай? Оны елестетті. Қандай жемісі бар екен? Жемісін жесе не болады екен? деп бір-бірімен кеңесті, сөз қылды және іштей соған деген құмарлық пайла болды. Сол құмарлық сыртқы әрекетке көшірді. Қолданыстағы сөз жақындау. Жақындау көбіне визуалдаумен болады. Егер мен күніне 5 минуттай өз жұмысыма қатысты жақсы нәтижелерді елестетсем, сол кезде өзімді жақсы сезінсем, онда тұрған дінге қарсы ештеңе жоқ қой. Алла тағала бізге берген мұндай күшті басқа бір тіршілік иелеріне бермеген. Соны мен пайдалансам, қай жерде, қай аятта, хадисте болмайды деп айтқан. Менің елестеткенімнің кімге зияны бар? Ешкімге зияны болмаса, дінде тыйым жасаған жоқ қой. Мысалы, қарайым ыдыстың өзін шебер визуалдамай, көз алдына елестетпей жасауы мүмкін емес қой. Іштей елестетпей, сыртқа әдемі дүние шығуы мүмкін емес. Қиялдаудың қай жері Аллаға серік қосу? Қиялдау дінге қайшы келді деп айтып жатқан адамдар соны дәлелдеп айту керек”, — дейді ол.
