Солтүстік Қазақстан облысында «Ұлы дала астығы — 2025» атты егіс күні өтті.

Жиында диқандар, күзгі дала жұмыстарына дайындық барысын пысықтап, ғалымдардың селекциялық өңдеу жұмыстарымен танысты. Сонымен қатар заманауи ауыл шаруашылығы техникаларының көрмесі мен агрокеңес ұйымдастырылды.

«Ұлы дала астығы — 2025» егіс күні Меңгесер ауылында өтті. Оған облыс әкімі Ғауез Нұрмұхамбетов пен ауыл шаруашылығы вице-министрі Аманғали Бердалин қатысты. Биыл өңірде 4,3 млн гектар жер игерілді. Мемлекет басшысының тапсырмасымен жергілікті диқандарға 130 млрд теңге бөлінді. Оның ішінде «Кең дала» бағдарламары бойынша қаржыландыру 2,5 есе артып, 97 млрд теңгеге жетті.

Нағашыбай Барлыбаев, фермер:

- Енді былтырдан бері біраз қаржы бөліп жатыр ғой, 5 пайызыбен. «Есілден» бізді қабылдайды. Біз 4 пайызға аламыз, 3,5 пайызға аламыз. Біраз алдық, сол арқылы біршама астықты ерте сатпай, кейінірек саттық. Бағасы көтерілген кезде саттық.

Геннадий Зенченко Солтүстік Қазақстан облысындағы ірі агроқұрылымдардың бірін басқарады. Тәжірибелі маманның айтуынша, биыл қамбаға мол өнім түседі. Ен далада жайқалып тұрған егіннің сапасы да жақсы.

Геннадий Зенченко, Қазақстанның Еңбек Ері:

- Үкімет ауыл шаруашылығы саласына бұрын-соңды болмаған қолдау көрсетіп жатыр. Фермерлерге арзандатылған тыңайтқыш, дизельдік отын, несие беріледі. Биылғы ауа райы да жақсы. Енді егінді дер кезінде жинап, әлемдік нарыққа өткізу керек.

Өңірде егін шаруашылығын әртараптандыру үшін 1 млн гектар жерге майлы дақылдар себілді. Биыл диқандар 340 мың тонна минералды тыңайтқыш сатып алды. Оның 60 пайызын мемлекет субсидиялайды. Облыс бойынша астық сақтау мәселесі де толық шешілген.

Дәурен Токужинов, Ауыл шаруашылығы басқармасының басшысы:

- Өңірде 6,9 млн тонна астық сақтайтын қойма бар. Оның 3,5 млн тоннасы элеваторларға тиесілі. Қалғаны жеке шаруашылықтарда орналасқан. Бұл егінді толық қабылдауға жетеді. Сонымен қатар фермерлерге 254 теңгеден 58,5 тонна дизель отыны бөлінеді.

Биыл шаруаларға 75,6 млрд теңге субсидия бөлінді. Егіс күні аясында ауыл шаруашылығы мамандарының қатысуымен алқалы агрокеңес өтті. Онда күзгі дала жұмыстары пысықталды. Биыл егін орағына 7 мың комбайн қатысады.

Айдарбек Айтмұхамбетұлы, Төлеген Иманов, 24kz