Бүгін Алматыда Мемлекеттік кеңесші Ерлан Қариннің төрағалығымен «Қазақстан тарихы: ежелгі дәуірден бүгінге дейін» атты жеті томдық академиялық басылымды әзірлеуге қатысты редакция алқасының кезекті отырысы өтті. Басқосуда редакция жалпы дауыс беру арқылы тарихи туындының бірінші томының қолжазбасын басып шығаруға әзірлеу үшін бекіту туралы шешім қабылдады. Сондай-ақ құнды еңбектің екінші томының мазмұнын талқылады. Авторлар ұжымының жетекшісі, тарих ғылымдарының докторы, Ұлттық ғылым академиясының академигі Болат Көмеков басылымның тұжырымдамасы, мазмұны және құрылымы туралы баяндады. «Түрік дәуірі» деп аталатын екінші томда қамтылатын тың деректер мен ерекшеліктері жайлы айтты. Отырыста тарих ғылымдарының докторлары, Ұлттық ғылым академиясының академиктері Мәмбет Қойгелді, Оразақ Смағұлов, тарих ғылымдарының докторлары Еркін Әбіл, Айболат Көшкімбаев және Галина Ксенжиктің рецензиялары тыңдалды. Оған қоса редакция алқасының өзге мүшелері – елге танымал тарихшы-ғалымдар да өз ой-пікірін ортаға салды.
Жазира Оразқызы
