Елдің батыс шекарасындағы « Сырым » өткізу бекеті 4 тамыздан бастап жөндеуге жабылады.
Сол кезеңде бекеттен тәулігіне қатынайтын жүк көліктерінің саны 700-ден 250-ге дейін қысқарады, ал жеңіл және қоғамдық көліктерге Тасқала, Шаған, Ақсай бекеттері арқылы шекарадан өту ұсынылады. Жөндеу жұмыстары келер жылдың соңына қарай аяқталады деп жоспарланған. Қайта жаңғыртудан кейін бекет арқылы Ресейге өтетін адам саны тәулігіне 6 мыңнан 10 мыңға, көлік саны 3 мыңнан 5 мыңға артпақ. Құрылыс жұмыстарына 21 миллиард теңге жұмсалады.
Данияр Дүйсенғалиев, «ҚазАвтоЖол» ҰК» АҚ БҚОФ бөлім басшысы:
- Жаңадан толығымен өткізу бекетін саламыз. Бұрынғыдан екі есе үлкен болады. Өткізу-жүру жолағы 14 жолаққа дейін көбейеді, бұрын 8 болса. Жаңадан ИДК деген құрылғы болады. Ол жалпы сөзбен айтқанда жүрген жүк көліктерін көлікті тоқтатпай жүрген бағытта рентген жасап, бәрін тексеріп отырады. Басқа да кішкентай рентгендер болады, бірақ ең негізгісі ИДК болады.
