Елімізде су саласы мамандарына көрсетілетін әлеуметтік қолдау шаралары артты.
Бұл туралы Су ресурстары және ирригация министрлігі ғылым және инновациялар департаментінің директоры Ләззат Жүсіпова мәлім етті, деп жазды Caravan.kz медиа порталы kaz.inform.kz-ке сілтеме жасап.
— Жұмысшы мамандықтары жылы аясында несиелік бағдарлама бойынша су саласының мамандарына тиімді шарттармен баспана алуға мүмкіндік берілді. Одан бөлек, секторды дамытуға елеулі үлес қосқан қызметкерлерге, гидротехниктерге, мелиораторларға «Қазақстанның су шаруашылығы саласының еңбек сіңірген қайраткері» деген атақ беріледі, — деді Ләззат Жүсіпова орталық коммуникациялар қызметі алаңында өткен баспасөз мәслихатында.
Сондай-ақ министрлік өкілінің мәлімдеуінше, су саласы мамандарының «Дипломмен ауылға» мемлекеттік бағдарламасын пайдалану мүмкіндігі бар.
— Сондай-ақ ауылға жұмыс істеу және тұру үшін келген агроөнеркәсіптік кешен саласындағы мамандарды әлеуметтік қолдау үшін көтерме жәрдемақы бюджеттік несие 7,8 млн теңгеге дейін өсті, — дейді спикер.
