Бағанашылдағы бейімдеу орталығына орналастырылған 39 жасөспірім бүгін Қонаев қаласында пайдалануға берілген жаңа ғимаратқа көшірілді.

Өмірлік қиын жағдайға тап болған балалар жаңа оқу жылы басталғанша заман талабына сай жарақтандырылған ғимаратта бейімдеуден өтеді. Олардың бәрі бірінші қыркүйекте облыс орталығындағы мектептерде білім ала бастайды, дейді мамандар.

Қонаевтағы жаңадан салынған ғимаратқа Бағанашылдағы бейімдеу орталығынан 39 жасөспірім автобуспен жеткізілді. Жеке инвестор оның құрылысына 4 млрд теңге бөлген. Заман талабына сай салынған орталық оқу және ойын кабинеттерімен, шығармашылық студия, спорт залы, жатын бөлмелермен, мамандарға арналған кабинеттермен жабдықталған.

Раина Мамытәлиева, оқушы:

- Қонаев қаласындағы жаңа балалар үйі өте керемет екен. Маған өте ұнады. Іші де, сырты да сапалы.

Нұржан Аманжол, оқушы:

- Бәрі жасалған, в общем бір сөзбен айтқанда бәрі ұнады маған. Ерекшелігі әрине бар, себебі новыйдың аты новый ғой. Арғы жақта енді бәрі ескі болды.

Нұрай Әбілқасымова, оқушы:

- Мына жер өте күшті. Заманауи дизайны. Кең, жарық, қаламыз, өте күшті.

«Облыс орталығынан салынған жаңа ғимаратқа көшіп келгендердің барлығы бейімдеу орталығындағы балалар. Олардың арасында Бағанашылдағы балалар үйінің тәрбиеленушілері жоқ. Балаларға бәрі ұнап жатыр, — деді облыстық білім басқармасының басшылары.

Ақмарал Атенбекова, білім басқармасы басшысының орынбасары:

- Алып келіп жатырмыз, балалар өте қуанышты. Балалар жалпы өздері қарсы емес. Бұл жерде баланың ешқандай құқығы бұзылмайды. Баланың пікірімен санасып, тәрбиешінің келісімімен міндетті түрде заңға сәйкес балалар қабылданатын болады.

Шолпан Аятбекова, тәрбиеші:

- Былай енді жалпы көңіл-күйіміз жақсы. Балаларға ешқандай қысым жасалған жоқ. Өздері келісім берді "барамыз, жаңа зданиеге барып, тұрғымыз келеді, жаңа үйіміз болғанын жақсы көреміз" деді, "ұнатамыз" деді. Сонымен солай бүгін балалардың келісімі бойынша көшіп келдік.

Қонаевтағы жаңа орталық 181 балаға арналған. Заман талабына сай салынған ғимарат 10 шілде күні облыстық білім басқармасының балансына өтті. Көшіп келген балалар жаңа оқу жылында Қонаев қаласында шоғырланған мектептер мен гимназияларда білім ала бастайды.

Ардақ Айбарұлы, Аманжол Жөңкешов