Алматы қаласының Алмалы аудандық соты өзін ҰҚК төрағасының жиені ретінде таныстырып, адамдарды ақшаға жұмысқа орналастырып беремін деп уәде берген 38 жастағы ер адамға үкім шығарды, — деп хабарлайды Massaget.kz тілшісі.
Сот материалдарына сәйкес 2024 жылы наурызда А.Т. А.М.-ға ҰҚК-ге жұмысқа орналастыруға көмектесемін деп уәде берген. Ол бұл көмегі үшін жәбірленушіден 6 497 400 теңге алған.
Сондай-ақ, ол танымал скрипкашы Айман Мұсақожаеваны қызметіне қайта тағайындап беремін деп уәде беріп, оның күйеуі Б.А.-дан делдал А.А. арқылы 45 миллион теңге алған.
Кейін Мұсақожаеваны қызметіне қайта тағайындау үшін қалған соманы төлеу керек деген желеумен А.А.-ға ресми түрде тиесілі LI L9MX маркалы, құны 33 миллион теңге тұратын көлікті де иемденген.
Сот оның әрекетін аса ірі мөлшерде бірнеше рет жасалған алаяқтық деп саралады. Айыпталушы кінәсін мойындап, жәбірленушілерге келтірілген шығынның орнын толық толтырған. Жәбірленушілер арыздарынан бас тартты, азаматтық талаптар қараусыз қалды.
Сонымен қатар, сот айыпталушыға 5 жыл бас бостандығынан айыру жазасын тағайындады, бірақ Конституцияның 30 жылдығына орай жарияланған рақымшылыққа байланысты мерзім 4 жылға дейін қысқартылды. Алайда жаза шартты түрде өтеледі, оған барлық мерзімге пробациялық бақылау белгіленді.
Сотталушыға қатысты "қамауда ұстау" түріндегі бұлтартпау шарасы күшін жойып, бірден босатылды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
