Өзбекстан жасанды интеллектінің көмегімен «Ақылды транспорт» деп аталатын жаңа жүйені іске қосып, ірі шахарларда кептелісті 30%-ға дейін азайтпақ. Ендігі жерде бағдаршамдар осы жүйенің көмегімен басқарылады. Бүгінде оның нақты механизмдері жасақталып жатыр. Ресми мәліметке сай, ел астанасы Ташкентте 3 миллионнан астам халық тұрады. Сәйкесінше, темір тұлпарлар саны да тым көп. Сондықтан мұнда көлік кептелісі аса өзекті проблемалардың қатарында. Әсіресе, жаз маусымында туристер ағыны артып, тасымал саласындағы мәселелер одан сайын күрделене түседі.
Мысалы былтыр көрші елде 9 жарым мыңға тарта жол апаты тіркелген. Мәселе жолдардың сапасына келіп тіреледі. Осыған орай билік «Қауіпсіз жол» ұлттық бағдарламасын бекітті. Мақсат инфрақұрылымды жаңғырту арқылы көлік апаттарын азайту. Тікелей үкіметке бағынатын қор құрылып, ереже бұзғандар төлеген айыппұлдың 25 пайызы осы қорды толықтыруға жұмсалады. Бұл қаржыға жолдардың қауіпті учаскелері жөнделіп, қоршаулар мен арнайы белгілер орнатылады.
Базаркүл Отыншиева
