Қыркүйекте Парламентте ұлтаралық қатынас, ақпараттық саясат және мемлекеттік тілге қатысты бірнеше заң жобасы қаралады.
Бұл туралы Алматыда Қазақстан халқы Ассамблеясы мүшелерімен, этно-мәдени бірлестіктердің өкілдерімен және мәслихат депутаттарымен кездескен сенатор Нұртөре Жүсіп айтты. Жиында этнос өкілдерінің мәдени іс-шаралармен қатар экономикалық- әлеуметтік тұрғыдағы бастамаларға да араласуы маңызды екені айтылды. Сондай-ақ қос палатаның бастамасымен құрылған «Бір ел – бір мүдде» депутаттық тобының жұмысы таныстырылды. Оның мақсаты – ел ішіндегі тұрақтылықты заңнамалық негізде қамтамасыз ету.
Нұртөре Жүсіп, ҚР Парламенті Сенатының депутаты:
- «Бір ел – бір мүдде» депутаттық тобы оған сенат депутаттары да кіреді, 60-тан астам депутаттардың қатысуыменен біз бірқатар ұлтаралық достықты, ынтымақтастықты нығайтуға бағытталған бірқатар шараларды жүзеге асыруды жоспарлап отырмыз. Алдағы уақытта олардың нәтижесін де көретін боламыз.
