Бүгін халықаралық полиэтилен пакеттерінен бас тарту күні.
Айтулы дата экологиялық мәселелерге көңіл аударып, қордаланған мәселелерді шешуге үндейді. Елімізде де бұл бағыттағы жобалар қолға алынған. Оларға 3 пайызбен жеңілдетілген несие беріле бастады. Сонымен қатар жергілікті атқарушы органдар қолдау көрсетеді.
Астаналық Руслан Орынтаев пластик қалдықтарын кәдеге жаратып отыр. Оның шағын зауыты қазірдің өзінде жылына 100 тонна қалдықты өңдейді. Кәсіпкер 20 адамды жұмыспен қамтып отыр. Бүгінде қаланы абаттандыруға керекті орындықтар, қоқыс шелектерін дайындайды. Бірақ өнім санын көбейтіп, өндіріс көлемін ұлғайтқысы келеді.
Руслан Орынтаев, кәсіпкер:
- Биыл зауытымызды кеңейтуді жоспарлап отырмыз. Өндіріс көлемін арттырып, жаңа өнімдер шығарғымыз келеді. Қазір кәріз құдығының қақпағына, қоршаулар, торлар, жол төсеніштеріне сұраныс бар. Сол бағытта жұмыс істейміз.
Бұл өнімдердің негізгі тұтынушысы әкімдік пен құрылыс компаниялары. Зауыт өндірген бұйымдарға сұраныс жоғары. Сондықтан кейде қосымша жұмыс күшін тартуға тура келеді. Бірақ құрылғылар саны шектеулі болғандықтан өнімділікті арттыру қиын дейді, мамандар. Сондықтан мемлекеттен қолдау сұраған.
Нұржан Дүйсебай, «Жасыл даму» АҚ Қоғаммен байланыс қызметінің бас менеджері:
- Да қазір Жасыл даму акционерлік қоғамы 377 млн теңгедей бөлінеді. Екінші кезеңде тұр. жақында ақшаны алып, одан да жақсартады. Жалпы айтқан кезде 64 жоба бар. Соның қазір 26 жобасы ақша бөлініп, жұмыс жасап жатыр.
Бұл ұйымдардың өңдейтін қалдықтары әртүрлі. Соның ішінде 20 шақтысы ғана пластиктен шикізат алуға маманданған. Сарапшылар бұл саланың әлеуеті жоғары дейді.
Батырбек Әубәкіров, қайталама шикізатты қайта өңдеушілер қауымдастығының төрағасы:
- Бұл болашақтың технологиясы. Күндердің күнінде мұнай мен газ таусылады. Сол кезде қалдықтар тұрмысқа қажет заттарды жасайтын шикізат керек. Мәселен, бес бөтелкені ұсақтап күртеше жасауға болады. Қазірдің өзінде әлемде түрлі маталар шығарылып жатыр. Оларды шетелден тасығанша өзімізде өндірейік. Сол үшін мемлекеттік сатып алу кезінде қайта өңделген шикізаттан жасалған тауарларға басымдық беру керек.
Адамзат жылына 2 млрд тоннадан астам қалдық шығарады. Яғни бұл қоқыстың өзін тиімді пайдаланса сарқылмас шикізат көзіне айналары сөзсіз.
Серік Селеубайұлы, Ақбота Түгел, Өрден Жарқын
