Еңбек және халықты әлеуметтік қорғау бірінші вице-министрі болған, сондай-ақ, "Еңбек ресурстарын дамыту орталығы" АҚ-ның басшысы қызметін атқарған Ақмәди Сарбасов ұсталды, — деп хабарлайды Massaget.kz тілшісі.
Экс-шенеунік ұсталғанын Еңбек және халықты әлеуметтік қорғау министрлігі растады.
"Министрлік тергеу органдарына белгіленген тәртіпте көмектесіп жатыр. Тергеу барысына қатысты барлық сұрақ уәкілетті органдардың құзыретінде", – деді ведомство өкілі.
Ақмәди Сарбасов биыл сәуірде басқа жұмысқа ауысуына байланысты еңбек вице-министрі қызметінен кеткен еді. Ол бұл қызметті 2020 жылғы маусымнан бастап атқарып келген болатын.
Telegram-дағы Kozachkov offside арнасында бұрынғы вице-министрдің ұсталуына мемлекеттік дерекқорлардан алынған ақпаратты коммерциялық ұйымға беру схемасының әшкереленуі себеп болуы мүмкін екені айтылған. Сот жеке компания басшысын және бұрын вице-министр болған екі жоғары лауазымды шенеунікті қамауға алуға санкция берген.
Мәліметке сүйенсек, "Бірінші кредиттік бюро" ЖШС басшысы Руслан Омаровқа айып тағылып, бұрынғы орталық басшысы Дәулет Арғандықов та қамауға алынған.
Жарияланған мәліметке сәйкес тергеу барысында Еңбек министрлігінің құрылымы саналатын "Еңбек ресурстарын дамыту орталығы" АҚ азаматтардың табыстары мен әлеуметтік төлемдері жөніндегі құпия ақпаратты "Бірінші кредиттік бюро" ЖШС-не бергені анықталған. Бұл мәліметтерге жедел қол жеткізу үшін БКБ арқылы жүйелі түрде пара беріп отырған.
Instagram парақшамызға жазылып, ең қызықты ақпараттарды бірінші болып оқыңыз!
