16-17 маусым күндері Қытай Халық Республикасының Төрағасы Си Цзиньпин Қазақстан Республикасына Мемлекет басшысы Қасым-Жомарт Тоқаевтың шақыруымен ресми сапармен келді.

Бұл туралы Caravan.kz медиа порталы хабарлайды.

Бүгін, 17 маусымда, Астанада аймақ елдері – Қазақстан, Қырғызстан, Тәжікстан, Түрікменстан және Өзбекстан президенттерінің қатысуымен «Орталық Азия – Қытай» екінші саммиті өтті.

Салтанатты кеште Қазақстанның халық әртісі Димаш Құдайберген қабылдаушы елдің мәдени өкілі ретінде мәртебелі жиналған қауымға өзінің репертуарынан қытай тіліндегі ең әдемі лирикалық әндердің бірі – «荆棘王冠» / «The Crown» әнін орындады.

Аталған туынды – алғаш рет 2017 жылы Астанада өткен жеке концертінде Димаш орындаған қазақстандық композитор Ұлықпан Жолдасовтың «Кім екен» әнінің қытай тіліндегі нұсқасы.

Іс-шаралар қарсаңында Қытайдың CGTN телеарнасы Димашты «Қытай – Орталық Азия: мәдени сұхбат» атты арнайы баяндамамен «Идеялар өзгеріс әкеледі» жобасына шақырды. Жоба Nazarbayev University-де түсірілді, деп жазады DimashNews.com.

«Құрметті жерлестер, астаналықтар мен CGTN арнасының көрермендері! Бүгін біз Қытай мен Орталық Азия жайлы сөйлесеміз. Мәдениет өкілі ретінде сіздермен жүздесіп отырғаныма өте қуаныштымын. Біз – тағдыр қосқан көршілерміз. Ең бастысы – көрші, бауырлас халықтар мен барлық мемлекеттер арасында бірлік, татулық пен амандық болсын. Бұл – менің шын жүректен тілеген тілегім», – деп бастады сөзін әйгілі әнші.

Димаш Си Цзиньпинге қазақ мәдениетіне және қазақ тіліндегі әндерге құрметпен қарағаны үшін алғысын білдірді.

«Еліміздің дипломатиялық қатынастары тереңдей түсіп, нығая берсін деймін. Айта кету артық болмас: әр мүмкіндікті пайдаланып, көрермен алдына шыққан сайын мен үнемі қайталаймын – әлемде бірлік, келісім, елдер арасында теңдік болсын. Ең бастысы – бейбітшілік. Ешбір бала жыламасын. Оның ұлты – грузин, итальян, француз, орыс, қазақ, америкалық – маңызды емес… Жаман ұлт болмайды. Мен көптеген елде болдым, ешқашан жаман халық бар деп айтпаймын. Сондықтан әрқашан дана болуға ұмтылуымыз керек, адамдардың жақсы жағын көруге тырысу қажет. Келіңіздер, махаббатты таратайық, бір-бірімізге демеу болайық», – деп қорытындылады Димаш Құдайберген.