АҚШ президенті Дональд Трамп әкімшілігі Америка Құрама Штаттарына тағы 36 елдің азаматтарына кіруге тыйым салуды қарастырып жатыр, — деп хабарлайды Massaget.kz тілшісі Reuters-ке сілтеме жасап.
АҚШ Мемлекеттік хатшысы Марко Рубио қол қойған ішкі дипломатиялық жеделхатта мемлекеттік департамент осы елдерге қатысты алаңдаушылық білдіріп, түзету шараларын қабылдауды талап еткен.
"Департамент алаңдаушылық тудырып отырған 36 елді анықтады. Бұл мемлекеттер 60 күн ішінде белгіленген шарттар мен талаптарды орындамаса, олардың кіруіне толық немесе ішінара тыйым салу ұсынылуы мүмкін", — деп жазылған жеделхатта.
Мемлекеттік департаменттің алаңдаушылық туғызуына себептердің бірі — жеке басын куәландыратын сенімді құжаттарды беру үшін осы елдердің кейбірінің құзыретті Үкіметі болмауы.
Жеделхатта кейбір елдер өз азаматтарын Америка Құрама Штаттарынан шығаруға ықпал етпегені айтылады. Кейбір елдер өз азаматтарына берілген АҚШ визаларын кешіктірген. Тағы бір себеп ел азаматтарының Америка Құрама Штаттарындағы терроризм актілеріне немесе антисемиттік және антиамерикалық әрекеттерге қатысуы болған.
60 күн ішінде осы мәселелерді шешпесе, толық немесе ішінара тыйым салынуы мүмкін елдер: Ангола, Антигуа және Барбуда, Бенин, Бутан, Буркина-Фасо, Кабо-Верде, Камбоджа, Камерун, Кот-д’Ивуар, Конго Демократиялық Республикасы, Джибути, Доминика, Эфиопия, Мысыр, Габон, Гамбия, Гана, Қырғызстан, Либерия, Малави, Мавритания, Нигер, Нигерия, Сент-Китс және Невис, Сент-Люсия, Сан-Томе және Принсипи, Сенегал, Оңтүстік Судан, Сирия, Танзания, Тонга, Тувалу, Уганда, Вануату, Замбия және Зимбабве.
Еске салайық, бұған дейін Дональд Трамп 12 елдің азаматтарына АҚШ-қа кіруге тыйым салды.
Өзекті жаңалықтарды өз уақытында оқу үшін Facebook парақшамызға жазылыңыз!
