Израиль қорғаныс күштері Иран тұрғындарына әскери инфрақұрылымға жақын орналасқан аймақтардан шұғыл түрде кету қажет екенін ескертті, деп хабарлайды ЦАХАЛ-ға сілтеме жасаған KAZ.NUR.KZ.
Израиль қорғаныс күштері ирандықтарға X әлеуметтік желісінде парсы тілінде әскери нысандардың айналасындағы аумақтардан кету керектігін ескертті. Бұл мәлімдемені олар әскери қару-жарақ зауыттарында немесе оларға жақын жерде және оларды қолдау объектілерінде орналасқан адамдарға жасап отыр.
Олар барлығын дереу аймақты тастап, келесі хабарландыруға дейін қайтып оралмауға шақырды.
Естеріңізге сала кетейік, жақында Израиль әскері Иранға соққы жасады.
Иранның ядролық бағдарламасының ең маңызды нысаны орналасқан Натанз қаласына жасалған шабуылдан кейін елде бірнеше жарылыс дыбысы естілді.
Бүған қатысты Атом энергиясы жөніндегі халықаралық агенттік басшысы түсінік беріп, Иранның ядролық нысанына соққы жасалғанын растады.
Ал Израильде төтенше жағдай жарияланды. Елдің қорғаныс министрі Кац жақын арада жауап ретінде Израиль мен оның бейбіт тұрғындарына соққы жасалуы мүмкін екенін ескертті.
Кейін ЦАХАЛ бригада генералы Эффи Дефрин Иран соңғы бірнеше сағат ішінде Израильге 100-ден астам ұшқышсыз ұшатын аппарат ұшырғанын айтты.
Иран Израильге жауап ретінде соққы жасады — Иранның мемлекеттік агенттігі жүздеген баллистикалық зымыран ұшырылғанын мәлімдеді. Зардап шеккендер бары әрі ғимараттардың қирағаны туралы хабарланды.
15 маусымға қараған түні Иран Израиль қалаларына тағы соққы жасады. Хайфа мен Израильдің солтүстігінде дабыл жүйелері іске қосылды. Израиль Иран қорғаныс министрлігінің штаб-пәтері мен Қорғаныс инновациялары және зерттеулер ұйымын атқылаған.
Қазақстанның Израильдегі елшілігі Таяу Шығыстағы жағдайдың ұшығуына байланысты сол елде жүрген отандастарымызға үндеу жасады.
Таяу Шығыстағы қақтығысқа қатысты еліміздің сыртқы істер министрлігі ресми мәлімдеме жасады.
"Қазақстан Республикасының Сыртқы істер министрлігі Таяу Шығыс өңіріндегі қауіпті әскери шиеленіске байланысты өз алаңдаушылығын білдіреді және қақтығысты БҰҰ Жарғысы мен халықаралық құқық нормаларына сәйкес тек саяси-дипломатиялық жолмен тез арада реттеуді құптайды. Қатысушы тараптарды барынша ұстамды болуға шақырамыз", - делінген Қазақстан Республикасы сыртқы істер министрлігінің мәлімдемесінде.
