Атырау облысы Қызылқоға ауданында жаңа көпір пайдалануға берілді. Екі жыл қатарынан келген тасқын кезінде аудан орталығы Миялы ауылын 6 округпен байланыстырып тұрған жол жырылған еді. Салдарынан қатынас үзіліп, ауылдықтар тек айналма жол арқылы діттеген жеріне жетіп жүрді. Қазір бұл мәселе толық шешілді. Енді тұрғындар су жаңа көпірдің игілігін көрмек.
Әділбек Нұрлығожиев, мердігер мекеменің басшысы:
Ұзындығы барлығы жолымен бірге 580 метр. Жолды сыздық, жол белгілерін салдық, жарықтандыру бағаналарын да орнаттық. 21 тіреуі бар, 27 шамы бар.
Ауыз су қондырғылары жаңартылуда
Жолдан бөлек тасқынның салдарынан 4 ауылдың су тазарту қондырғысы жарамсыз болып қалған еді. Қазір жергілікті бюджеттен 380 млн теңге бөлініп, ғимараттарды жөндеу жұмысы басталды. Индер ауданына қарасты Бөдене ауылының тұрғындары тазартылған тіршілік нәрінің игілігін көре бастады. Енді Жайық өзенінен алынған су тұндырылып, сүзіліп, арнайы фильтрлерден өткізіледі. Осындай жұмыс Аққала ауылдық округінде де басталған. Көктоғай ауылының ауыз су қондырғысының жобасы сараптамадан өтуде. Сондай-ақ, биыл аудан орталғында 4 шақырым су құбыры жаңартылып, ауыз су стансаларының қуаты артады.
Телман Ерғазиев, «Индер су» мекемесінің директоры:
Мысалы, Индербор кентінде тәулігіне 2400 текше метр беретін қуаттылығы болса, соны 3200-ге көбейтіп жатырмыз. Және кәріз суын тазалау қондырғысының да жобасы жасалып, қазір экспертизада. Жылдың аяғына дейін бәрін бітіріп, жұмысты бастайтын боламыз.
Нұрсұлтан Нұрсейіт
