Француз ұлтының өкілі Кристин Сорнин жүрегіне күрделі операциялар жасатқан кезде дәрігерге Димаш Құдайбергеннің әнін қойдырған. 68 жастағы әйелге қазақ әншісінің дауысы қорқынышты сәтте демеу болған, деп хабарлайды Skifnews.kz ақпарат порталы.
Ол Аqshamnews.kz басылымына сұхбат беріп, Димаш әнінің құдіреті туралы айтып берген.
Өмір бойы спортпен шұғылданған Кристиннің денсаулығы уақыт өте сыр бере бастаған. Дәрігерлер оған жүрек-қан тамыры ауруы диагнозын қойып, ота жасау керегін айтқан. Бір қызығы, дәрігер мұндай күрделі отаны жасау барысында Кристиннің жүрек тұсын ғана жансыздандырған. Кейіпкер 2 сағат бойы есін біліп жатқан.
«Әрине, қатты қорықтым, қобалжыдым. Дәрігерлер мені тыныштандыру үшін «Сізге не демеу береді?» деп сұрады. Мен ойланбастан «Димаштың әні» деп жауап бердім. Олар Димаштың тегін әрең жазғаны есімде. Сол бір қорқынышты сәтте оның дауысы маған қараңғыдағы шамдай үміт берді», – дейді Кристин.
Зейнеткер Димаштың өнерімен кездейсоқ танысқан.
«Бір күні ғаламтордан Димаштың кездейсоқ әнін тыңдап қалдым. «Бұл кім өзі?» деген сұрақ келді. Себебі мен адам даусына көп мән беретінмін. Ал оның даусы өте ерекше. Алғаш естіген әнім – «Ұмытылмас күн». Сол сәттен бастап ол мені баурап алды», – дейді ол.
Кристин Сорнин сақтандыру саласында қызмет етсе де, бос уақытында театр қойылымдарын сахналап, екі жұмысты қатар алып жүрген. Кейін ол қойылымдарды сахналау өнерін үйрену үшін күйеуімен бірге Аргентинаға көшіп, испан тілін меңгерген. Қазір зейнетте. Кристин бос уақытында сурет салып, роман жазады. Оның шығармашылығына шабыт берген адам – Димаш. Ол Димаштың өнерімен танысқалы шығармашылық шарықтау шегіне жеткенін айтты.
«Сурет сала бастадым, роман жазуға отырдым. Шабытым ашылып, өзімді қайта тапқандай болдым. Бір жылдан бері роман жазып жүрмін. Әзірге оның қандай боларын білмеймін. Фильм, әлде театр қойылымы боларын уақыт көрсетеді», — деп қорытындылады сөзін кейіпкер.
