«Таза Қазақстан» экологиялық акциясы аясында Щучье көлінің жағалауы қоқыстан тазаланды, деп хабарлайды 24KZ. Шараға еріктілер, жақын маңдағы ауыл тұрғындары мен қоғам белсенділері қатысты. Көпшілік суға шомылатын жағажай аумағы да ретке келтірілді. Тұрмыстық қалдықтарды жинауға 100-ден астам адам жұмылдырылды.
Жалпы курортты өлкеге жылына миллиондаған турист демалуға келеді. Сондықтан жергілікті билік өкілдері алдағы уақытта барлық өзен-көлдің жағасын жинап тазартуды көздеп отыр.
Мәнсия Есекеева, ҚР Мәдениет және ақпарат министрлігінің басқарма басшысы:
- Ең бірінші туристік маусымның ашылуында осындай жақсы экоакция өткізіп жатырмыз. Бұдан әрі әрбір келген туристі еліміздің таңғажайып жерін – Бурабай өлкесін танып қана қоймай, өздерінен кейін қоқысты жинап кетіп, таза ұстауға шақырғымыз келеді.
