Қазақстанның Біріккен Ұлттар Ұйымындағы тұрақты өкілдігі Нью-Йорктегі жыл сайынғы қайырымдылық жәрмеңкесіне қатысып, төл мәдениетімізді дәріптеді.
Ізгі шараны «БҰҰ-ға мүше мемлекеттердің елшілері мен дипломаттар әйелдерінің клубы» атты қауымдастық ұйымдастырды. Биыл да қатысушылар қайырымдылық мақсатында түрлі қолөнер бұйымдары мен ұлттық тағамдарды жұрт назарына ұсынып, концерттік бағдарлама аясында өз өнерлерін көрсетті. Қазақстандық тарап та күмбірлеген күймен, мың бұралған бимен көптің қошеметіне бөленді. Шетелдіктер әсіресе Нұрғиса Тілендиевтің «Аққу» күйіне, нәзік құс бейнесінде биші қимылына тәнті болып, өнерпаздарды қошеметке бөледі. Сондай-ақ төл тағамдарымыздан ауыз тиіп, қуырдақ пен бауырсақтан дәм татты. Жәрмеңкеден жиналған барлық қаражат әлемдегі гуманитарлық дағдарыстан зардап шеккендерге жұмсалмақ.
Альмира Сағымбаева, ҚР БҰҰ тұрақты өкілдігінің қызметкері:
- Бүгін БҰҰ алаңында Қазақстан Республикасының Тұрақты өкілдігінің қатысуымен қайырымдылық базарын өткізіп жатырмыз. Бұл базардың негізгі мақсаты – жақсылықты, береке мен бірлікті, татулықты, бейбітшілікті насихаттау. Бұл базарға қатысып отырған әрбір елге, ұйымдастырушыларға үлкен ризашылығымызды білдіреміз. Рақметімізді айтамыз. Өйткені бұл жерде сатылатын әрбір тауар – ол тек қана зат емес, әрбір адамның іштен шыққан жылылық сезімі, жақсылықты насихаттау іспеттес.
Сесилия Миламбо, "БҰҰ дипломаттарының жұбайлары" клубының президенті:
- Осындай ізгі шараның куәсі болғаныма өте қуаныштымын. Биыл әрбір қатысушы тараптың зор қолдауын сезіндік. Соның ішінде Қазақстандық әріптестеріміз осы бір қайырымдылық шарасына өте белсенді түрде қатысты. Қазақтың төл өнеріне, ән-биіне тәнті болдық. Мол дастарқаннан дәм таттық. Бұл дәстүр жыл сайын осындай жоғары деңгейде өтсе деген тілегім бар.
