"Ақтөбе" өз алаңында "Қайратқа" есе жіберіп, 11-турдың басты матчы драмаға толы болды.
Қазақстан Премьер-лигасының 11-турындағы матчтардың бірі "Ақтөбе" мен "Қайрат" арасындағы кездесумен есте қалды. Ақтөбеде өткен ойында қонақтар 2:1 есебімен жеңіске жетіп, үш ұпай еншіледі.
Барлық голдар екінші таймда соғылды. 50-минутта алаң иелері бірінші болып есеп ашты. Мергендігімен көзге түскен Аян Байдәулетов командасын алға шығарды. Алайда ақтөбеліктердың басымдығы ұзаққа созылмады. 71-минутта "Қайраттың" жартылай қорғаушысы Валерий Громыко қызыл қағаз алып, алаңнан қуылды. Дегенмен, 75-минутта Александр Мартыновичтің баспен соққан голы арқасында алматылықтар есепті теңестірді.
Ойын қыза түскен шақта "Қайраттың" бас бапкері Рафаэль Уразбахтин "Ақтөбе" жанкүйерлерін балағаттағаны үшін қызыл қағаз алып, орнынан кетуге мәжбүр болды. Соған қарамастан, 87-минутта 16 жастағы жас талант Дастан Сәтпаев шешуші гол салып, командасына маңызды жеңіс сыйлады.
Осылайша 16 жастағы Дастан Сәтпаев КПЛ-2025 маусымының сұрмергендер жарысында көш бастады. Ол маусымдағы 8-голын салып, бомбардирлер рейтингінде бірінші орынға шықты. "Қайрат" шабуылшысы қазіргі таңда Томасов пен ұлттық құраманың бірнеше ойыншысын артта қалдырды.
Айта кетейік, Дастан Сәтпаев ағылшынның "Челси" клубымен биыл келісімшартқа отырып, қазіргі кезде "Қайратта" ойнап жүр. Оның қарқынды дамуы шетелдік скауттар мен футбол сарапшыларының назарын өзіне аудартуда.
11-турдың аясында тағы бірнеше қызықты матчтар өтті. "Астана" сырт алаңда "Елімайды" сенімді түрде жеңді. "Тобыл" қарсыласын 5:0 есебімен тас-талқан етті. "Жеңіс" пен "Ордабасы" арасындағы тартысты ойында камбэк тіркеліп, екі ойыншы алаңнан қуылды.
11-тур бүгін аяқталады. Турдың соңғы матчтары: "Оқжетпес" — "Қызылжар", "Ұлытау" — "Тұран", "Қайсар" — "Жетісу" кездесулері жанкүйерлерге тамаша футбол кешін сыйлайды.
