Дональд Трамптың Гарвард университетіне шетелдік студенттерді қабылдауға тыйым салу туралы бұйрығы сот шешімімен уақытша тоқтатылды
Бұл туралы Caravan.kz медиа порталы Azattyq ruhy-на сілтеме жасап хабарлайды.
2025 жылғы 29 мамырда Бостон қаласындағы федералды соттың судьясы Эллисон Берроуз президент Дональд Трамптың Гарвард университетіне шетелдік студенттерді қабылдауға тыйым салу туралы шешімін уақытша тоқтатты.
Судья Берроуз бұл шешім арқылы «қалыптасқан жағдайды сақтау» мақсат етілгенін айтты, яғни, мәселе толық шешілмейінше, бұрынғыдай шетелдік студенттерді қабылдау процесі жалғаса береді. Осылайша, Ақ үй әзірге Гарвард университетіне шетелдік студенттерді қабылдау және алмасу бағдарламасын жүргізуге мүмкіндік беретін SEVP (Student and Exchange Visitor Program) сертификатын жоя алмайды.
22 мамыр күні АҚШ-тың ішкі қауіпсіздік министрі Кристи Ноэм Гарвард университетін «зорлық-зомбылықты насихаттады, антисемитизмге жол берді және Қытайдың Коммунистік партиясымен байланысы бар» деп айыптап, SEVP сертификатын тоқтату туралы бұйрық берген болатын. Келесі күні Гарвард университеті Трамп әкімшілігіне қарсы сотқа шағым түсірді. Дәл сол күні судья Берроуз Ақ үйдің әмірін уақытша тыйып тастады.
27 мамыр, сейсенбі күні Politico басылымы Трамп әкімшілігі АҚШ-қа студенттік виза алуға арналған жаңа сұхбаттарды уақытша тоқтату туралы бұйрық бергенін хабарлады. Бұл шешім студенттердің әлеуметтік желілерін бақылауға алдуды қатаңдату аясында қабылданған.
Ақпарат құралдары барлық шетелдік студенттің әлеуметтік желілерін міндетті түрде қатаң тексеру шарасы қарастырылып жатқанын жазып жатыр. Бұл туралы АҚШ мемлекеттік хатшысы Марко Рубио қол қойған жеделхатта айтылған.
