Үкімет осы мәселеге қатысты өзінің ұстанымын жариялады.
Қазақстанда ажырасқан кезде төленетін мемлекеттік баж мөлшері артатын болды, деп хабарлайды inbusiness.kz сайты.
Премьер-министр Олжас Бектенов депутаттардың сауалына берген жауабында осылай деді.
"Қазіргі күні жаңа Салық кодексінің жобасы Парламент Сенатында қаралып жатыр. Жобада некені бұзғаны үшін мемлекеттік баж мөлшері 5 АЕК-ке (19 660 теңге) дейін ұлғайту қарастырылған. Бүгінде ақы төлеу мөлшері өзара келісу бойынша 7728 теңге, хабар-ошарсыз кеткен, әрекетке қабілетсіз немесе сотталған адаммен бұзу бойынша 386 теңге", — делінген Үкімет басшысының берген жауабында.
Үкімет дәстүрлі отбасы құндылықтарын ілгерілету бойынша жүйелі
жұмыстар атқарып жатқаны туралы айтылған. Отбасы және неке институтын сақтау мен нығайтудың 2025-
2027 жылдарға арналған іс-шаралар жоспары бекітілген.
"Жалпы алғанда Ұлттық статистика бюросының ақпаратына сәйкес соңғы 5 жылда елде ажырасу саны азайған (2020 жылы — 48,2 мың, 2024 жылы – 40,5 мың, 16%-ға төмендеген). Мұндай үрдіс мемлекеттік қолдау саясатының түбегейлі қайта қаралуымен байланысты болды. Дәстүрлі отбасылық құндылықтарды дамытудың 2025 жылға арналған медиа-жоспары қабылданды. Түсіндіру жұмыстары шеңберінде әлеуметтік
желілер, сыртқы жарнама, білім беру мекемелері, АХАТ органдары мен беделді
қоғам көшбасшылары тартылуда", — деді Олжас Бектенов.
Бұған дейін ажырасатындарға бұрын-соңды болмаған салық салу ұсынылғанын жазған едік.
