Беларусь футбол федерациясы Беларусь пен Қазақстан ұлттық құрамалары арасындағы жолдастық матчтың өтетін орнын өзгерту туралы ресми мәлімдеме жасады.
Минск қаласындағы Футбол үйінде Беларусь футбол федерациясы қауымдастығының (АБФФ) Төтенше Атқару комитетінің отырысы өтіп, маңызды шешім қабылданды. Алдағы халықаралық жолдастық матчтың өтетін орны ауысты.
Беларусь пен Қазақстан ұлттық құрамалары арасындағы 5 маусымға жоспарланған кездесу бастапқыда Минскідегі "Динамо" Ұлттық олимпиадалық стадионында өтеді деп жоспарланған еді. Алайда, мамырдың 24–25 күндері стадионда өткен іс-шаралардан кейін алаң айтарлықтай зақымданып, мамандардың қорытындысы бойынша, алаң төсенішін қалпына келтіруге кемінде екі апта қажет.
Осыған байланысты матч Борисов қаласындағы "Борисов-Аренада" өтетін болды. Бұл шешім УЕФА және Қазақстан футбол федерациясымен келісілген.
Айта кетейік, Қазақстан құрамасы жолдастық матчтан кейін келесі ойынын 9 маусым күні өткізеді. Бас бапкер Әли Әлиевтің шәкірттері 2026 жылғы әлем чемпионатының іріктеу кезеңі аясында Солтүстік Македониямен "Астана-Аренада" кездеседі.
