Бұл туралы БҰҰ-ның Дүниежүзілік метеорологиялық ұйымы (ДМҰ) жариялаған жаңа есепте айтылды .
Алдағы 5 жылда әлем бұрын-соңды болмаған жоғары температураларға тап болуы мүмкін, деп жазады inbusiness.kz сайты.
Метеорологтардың болжамына сәйкес, 2025-2029 жылдар аралығында кем дегенде бір жыл рекордтық ыстық болуы ықтимал.
Сонымен қатар, осы кезеңде жаһандық орташа температура өнеркәсіпке дейінгі кезеңмен салыстырғанда 1,5°C-тан асып кетуі мүмкін. Бұл – 2015 жылғы Париж келісімінің межесін алғаш рет бұзу деген сөз.
Есепте Арктикада температураның жаһандық орташа деңгейден үш есеге жуық артық көтерілетіні айтылған. Алдағы 5 қыс маусымында бұл аймақтағы ауа температурасы соңғы 30 жылдық көрсеткішпен салыстырғанда 2,4°C-қа жоғары болады деп күтілуде.
Бұл аймақтағы және Тынық мұхитының солтүстік-батысындағы мұз қабатының тез еруіне әкелуі мүмкін.
"Жаһандық жылынудың әрбір қосымша үлесі төтенше ауа райына қауіпті ыстыққа, нөсерге, құрғақшылыққа және теңіз деңгейінің көтерілуіне себеп болады", – делінген ДМҰ мәлімдемесінде.
2025-2029 жылдар аралығында Сахель, Солтүстік Еуропа, Аляска мен Сібірде жауын-шашын мөлшері орташа деңгейден жоғары болады деп күтілуде. Ал Амазония алқабында, керісінше, қуаңшылық болуы мүмкін.
Мамандар жаһандық орташа температура осы онжылдықтың соңына дейін рекордтық немесе оған жақын деңгейде сақталады деп ескертуде.
