Биыл ел шығысында электр жарығы 1700 рет өшті.
Себебі аймақтағы желілер әбден тозған. Шалғайдағы ауылдар тұрмақ, қалалық жердегі сымдар ескірген. Әйтсе де, "қызмет көрсетуші компания өкілдері ұзындығы 34 мың шақырымнан асатын желіні шұғыл ауыстыру оңай емес" дейді. Сондықтан бұл жоба кезең-кезеңімен жүзеге асырылмақ.
Электр қуатын жеткізетін оператор Шығыс Қазақстан және Абай облысына қызмет көрсетеді. Екі аумаққа тартылған сымның ұзындығы 34 мың шақырымнан асады. Сала өкілдері желілердің әбден тозығы жеткенін жасырмайды. Әсіресе шалғайдағы елді мекендерде құлағалы тұрған баған да, үзілгелі тұрған сым да көп.
Эльмира Ахметова, тілші:
- Ел шығысында электр желісінің кетеуі кеткен. Бүгінде 80-90 проценті тозып тұр. Салдарынан үп еткен жел соқса, жалп етіп жарық өшетін жағдай жиі тіркеледі. Кейбір шалғай ауылдардағы трансформаторлардың қойылғанына 40-50 жыл болған. Ал электр бағандары мінеки әбден шіріп, бір жаққа қисайып, әрең тұр.
Жаңа Бұқтырма кенті — туристік мекен. Жазда су қоймасының жағасынан адам үзілмейді. Демалыс базалары да жетерлік. Сондықтан электр қуаты аз уақытқа өшіп қалса, демалушыларға қолайсыздық тудырады. Кәсіпкерлер шығынға батады. Ал қысқы маусымда желінің жүйелі жұмыс істеуі тіптен маңызды.
Қуат Жуанғанов, Алтай ауданы ТҮКШ бөлімінің басшысы:
- Апатты жағдайлар кезінде қазандықтың жұмысы да тоқтайды. Осындай келеңсіздік қайталанбас үшін қосымша резервтік көз дайындап, дизельді генератор сатып алдық.
Татьяна Толстова кенттің байырғы тұрғыны. Айтуынша, қазір жарықтың сөнуі азайған. Бірақ аракідік өшіп қалса, тірлік тоқтағандай көрінеді дейді ол. Сондықтан саланың жедел жаңартылғанын қалайды.
Татьяна Толстова, Жаңа Бұқтырма кентінің тұрғыны:
- Электр қуаты болмаса біздің өміріміз де тоқтап қалғандай болады. Қазір бүкіл жұмыс электр энергиясына байланысты. Тамағымыз да, тірлігіміз де соған қарап тұр.
Осы Алтай ауданында әкімдік қарамағындағы электр желісі ауыстырылып жатыр. Алтай қаласы мен Малеев, Путинцев ауылдарына жаңадан 137 баған қойылды. Бірақ бұл көлге тамған тамшыдай. Шығыс Қазақстан мен көрші облысқа созылып жатқан желіні түбегейлі жаңарту үшін әлі ондаған жыл қажет. Кезеңдеп жөндеу арқасында қазір тозу деңгейі 84 процентке дейін төмендеді
Әйгерім Арғынбай, біріккен энергосервистік компаниясы баспасөз орталығының бас менеджері:
- 2026-2030 жылдарға арналған инвестициялық бағдарлама жоспарланып отыр. Бұл кезеңде біз жаңғырту жұмыстарын жалғастырып, тозу көрсеткішін тағы 11 процентке төмендетеміз.
Бұл инвестициялық бағдарлама аясында жалпы екі мың шақырым желі жаңартылып, жоғарғы вольтті қосымша станция салынбақ.
Эльмира Ахметова, Жігер Бабаханов
